Turǵyn úı salasyndaǵy qatynastardy retteý maqsatynda byltyr qabyldanǵan zańnyń birqatar normalary tolyq júzege aspaı otyr - E. Nyǵmatýlın
áýirdiń 22-ci. QazAqparat /Qanat Mámetqazyuly/ - Búgin QR Parlamenti Májilisinde «Turǵyn úı qatynastaryn retteıtin zańnamany iske asyrýdyń praktıkalyq aspektileri» atty taqyrypta dóńgelek ústel bolyp ótti. Jıyndy «Nur Otan» HDP QR Parlamenti Májilisindegi fraktsııasy janyndaǵy Qoǵamdyq uıymdarmen baılanys jónindegi keńesi uıymdastyryp otyr,
dep habarlaıdy QazAqparat.
«Byltyrǵy jyly turǵyn úı salasyndaǵy júıeli qaıta qurýlardy júzege asyrý maqsatynda Memleket basshysy turǵyn úı-kommýnaldyq sala máseleleri jónindegi zańǵa qol qoıǵan bolatyn. Bul zańnyń negizgi qamtyǵan máseleleri turǵyn úı qoryn jańǵyrtýmen ony ustap turýdy qarjylyq qoldaý, kondomınımým nysandarynyń jalpyǵa ortaq múlikterin jóndeýden ótkizýdi qamtamasyz etý, sondaı-aq baspanamen qamtamasyz etý máselesinde kómek kórsetý, az qamtylǵan otbasylarǵa memlekettik qoldaý jasaý bolatyn. Ókinishke qaraı, biz búgin atalǵan zańnyń birqatar áleýmettik mańyzdy normalarynyń tolyq aýqymda júzege aspaı otyrǵanyn moıyndaýǵa tıispiz. Atap aıtqanda, zańnamada qamtylǵan turǵyn úımen qamtamasyz etýdegi kómek, jergilikti turǵyn úı ınspektsııalaryn qurý sekildi normalar tolyq júzege aspaı otyr», dedi jıyndy ashyp sóz sóılegen depýtat Erlan Nyǵmatýlın.
Onyń aıtýynsha, turǵyn úı salasyndaǵy problemalardy tolyq eńserý úshin eń aldymen qamtylǵan zań normalaryn aıaǵyna deıin júzege asyrý qajet.
Jıyn barysynda Qurylys isteri jónindegi jáne turǵyn úı kommýnaldyq sharýashylyǵy agenttiginiń tóraǵasy Serik Nokın baıandama jasap, saladaǵy atqarylyp jatqan sharalarmen tanystyrdy. Sondaı-aq dóńgelek ústelde turǵyn úı qatynastary boıynsha zańnamalyq qamtýlardy jetildire túsýge qatysty pikir almasyldy.
