Turǵyn úı qurylysynda úlestik qatysý máselesi boıynsha vedomstvoaralyq komıssııa quryldy
ASTANA. 28 tamyz. QazAqparat - Qazirgi tańda barlyq jergilikti atqarýshy organdarda quqyq qorǵaý organdary men múddeli uıymdardyń qatysýymen turǵyn úı qurylysyndaǵy úlestik qatysý máselesi boıynsha vedomstvoaralyq komıssııalar quryldy. Atalǵan komıssııalar nysandarda túgendeý jumystaryn júrgizedi.
Atalǵan nysandardyń qurylysyn aıaqtaý úshin úleskerlerdiń qarajaty tartylady. Sonymen qatar, osyndaı nysandardyń qurylysyn uıymdastyratyn qurylys salýshylardyń jumystaryna taldaý jasalady. Bul týraly QR Óńirlik damý mınıstrliginiń baspasóz qyzmetinen habarlady.
Vedomstvonyń aqparatyna qaraǵanda, eger qurylys salýshy jasalǵan shart boıynsha úleskerdiń aldyndaǵy mindetterin oryndaý múmkindigi bolmaǵan nemese birlese ınvestor azamattardyń qarajaty esebinen turǵyn úıdi satý faktileri anyqtalǵan jaǵdaıda osyndaı qurylys salýshy kompanııalarǵa qatysty Qazaqstan Respýblıkasynyń qoldanystaǵy zańnamasynda kózdelgen qylmystyq jazaǵa deıin eń qatań sharalar qoldanylatyn bolady.
Sonymen qatar, qurylys salýshylar úshin «Turǵyn úı qurylysyndaǵy úlestik qatysý týraly» Zań aıasynan tys úleskerlerdiń aqshalaı qarajattaryn tartý múmkindigin joqqa shyǵarý maqsatynda Qazaqstan Respýblıkasynyń Óńirlik damý mınıstrligi aǵymdaǵy jylǵy 15 shildede kúshine engen qoldanystaǵy Zańǵa tıisti ózgertýler engizdi.
Zańǵa engizilgen ózgertýler Zańnyń kúshin eki jaqtyń barlyq quqyqtyq qatynastaryna qoldanýǵa múmkindik beredi. Onda bir adamnyń qarajatyn tartyp, turǵyn úı qurylysyn uıymdastyrady, al basqa adam qurylys nátıjesi boıynsha turǵyn úı-jaı túrinde úles alý maqsatynda qarajat salady.
