Turǵyn úı qurylysyna úlestik qatysýshylardyń quqyǵy men múddesi kúsheıtiledi
ASTANA. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Turǵyn úı qurylysyna úlestik qatysý týraly» zań jobasy talqylandy.
Zań jobasy úleskerlerdiń quqy men múddesin qorǵaýǵa baǵyttalady. Sonymen qatar, turǵyn úı qurylysyna úlestik qatysý qatynastaryn retteý boıynsha quqyqtyq alań qurý qamtamasyz etilmek. Atap aıtqanda, turǵyn úı qurylysyna úlestik qatysýdy uıymdastyrý tetikteri jetildiriledi. Bul rette Kepildendirilgen turǵyn úı qurylysy qorynan kepil alý, jobaǵa ekinshi deńgeıli bankterdi qatystyrý, turǵyn úı qurylysynyń qańqasy turǵyzylǵannan soń baryp úleskerler qarajatyn paıdalanýǵa ruqsat berý normalary kózdelip otyr. Sonymen qosa, qujat boıynsha zańnamada qarastyrylmaǵan basqa da joldarmen turǵyn úı qurylysy úshin úleskerlerdiń qarajatyn tartýǵa tyıym salynady.
Budan bólek, úleskerlerdiń qatysýymen salynatyn turǵyn úı qurylysynyń tıimdiligin qamtamasyz etý maqsatynda Úkimettiń, ýákiletti organnyń, jergilikti atqarýshy organnyń quzyreti nyǵaıady. Úleskerlerdiń quqy men mindetteri, turǵyn úı qurylysyna úlestik qatysý jónindegi taraptardyń jaýapkershiligi men mindetteriniń oryndalýy reglamentteledi.
Talqylaý barysynda senatorlar qurylys salýshy ókiletti kompanııalar tarapynan negizsiz dempıngke jol berý múmkindigin boldyrmaý úshin sharshy metrdiń eń tómengi baǵasyn qarastyrýdy usyndy. Bunymen qosa, depýtattar úleskerlerdiń quqyǵyn qorǵaýdy kúsheıtý maqsatynda ókiletti kompanııanyń mindettemeleri boıynsha sýbsıdııalanatyn jaýapkershilikti engizý máselesin kóterdi.
Tutastaı alǵanda, zań jobasy úleskerlerdiń, qurylys salýshylar men ókiletti kompanııanyń zańdy múddelerin júzege asyryp, olardyń quqyǵyn tıimdi qorǵaýǵa baǵyttalady. Qujat palatanyń aldaǵy ýaqytta ótetin jalpy otyrysyna shyǵarylady.
