Turǵyn úı qurylysyna úlestik qatysý zańyn buzǵandarǵa salynatyn aıyppul ósedi

ASTANA. QazAqparat - Turǵyn úı qurylysyna úlestik qatysý zańyn buzǵandarǵa salynatyn aıyppul kórsetkishi ósedi. Bul týraly búgin Májiliste «Turǵyn úı qurylysyndaǵy úlestik qatysý týraly» zań jobasynyń tanystyrylymy barysynda Ulttyq ekonomıka vıtse-mınıstri Qaıyrbek Óskenbaev málim etti.

Vıtse-mınıstrdiń aıtýynsha, zań jobasynda buzýshylyqtar anyqtalǵan jaǵdaıda qurylys salýshy men jobalaýshy uıymnyń ákimshilik jaýapkershiligi qarastyrylady.

«Atap aıtqanda, qurylys salýshy nemese jobalaýshy kompanııalarǵa turǵyn úı qurylysyna úlestik qatysý týraly zańnama talaptaryn buzǵany úshin 200-den 300 aılyq eseptik kórsetkishke deıin aıyppul belgilenip otyr. Al bul zańbuzýshylyq bir jyl ishinde qaıtalansa, qurylys salýshy kompanııa ruqsatynan aıyrylady», - dedi Qaıyrbek Óskenbaev.

Budan bólek, turǵyn úı qurylysyna úlestik qatysý týraly zańnama talaptaryn buzǵan ınjınırıngtik kompanııaǵa salynatyn aıyppul da 200-300 aılyq eseptik kórsetkish aralyǵynda qaralady. Zańbuzýshylyq qaıtalanǵan jaǵdaıda aıyppul 400 AEK deıin artady.

«Sarapshylar zań buzsa, salynatyn aıyppul 100 AEK, qaıtalansa, sarapshy attestatyn qaıtaryp alýmen qosa 200 AEK kóleminde taǵaıyndalady. Bul rette kez-kelgen ınjınırıngtik kompanııa sarapshysynyń attestattan aıyrylýy sol kompanııa qyzmetin 6 aıǵa deıin toqtatýǵa ákep soqtyrady», - deıdi Q.Óskenbaev.