Turǵyn úı qurylysyna úlestik qatysý týraly zań qabyldandy - Senat
ASTANA. QazAqparat - Búgin Senattyń jalpy otyrysynda palata depýtattary «Turǵyn úı qurylysyna úlestik qatysý týraly» QR Zańyn qabyldady.
Qujat úleskerlerdiń quqyqtary men múddelerin qorǵaýǵa baǵyttalǵan zańnamany odan ári jetildirýge baǵyttalady. Osy maqsatta turǵyn úı qurylysyna úlestik qatysýshylardyń qarym-qatynasyn retteý úshin quqyqtyq alań qurylatyn bolady.
Osyǵan oraı, zań arqyly túrǵyn úı qurylysyna qatysýdyń jańa tásilderi qamtylyp otyr. Bular: turǵyn úı qurylysyna úlestik qatysý boıynsha kepildikter berý; ekinshi deńgeıli bankter arqyly jobany qarjylandyrý; turǵyn úı qańqasyn qurylys salýshynyń jeke qarajatyna turǵyzý. Osyǵan oraı, turǵyn úı ǵımaratyn salý úshin zańnamada kózdelmegen ózge tásilder boıynsha úleskerler qarajatyn tartýǵa tyıym salynatyn bolady.
«Bul rette birinshi tásil boıynsha qurylys salýshy ýákiletti qompanııa qurady. Sosyn onyń jarǵylyq kapıtalyna jer ýchaskesin, jobalaý, smetalyq hattamany, qarajat nemese jobalyq qunynan 10-15 paıyzdyq kólemde aıaqtalmaǵan qurylysty kirgizedi. Qurylys salýshyda respýblıkalyq mańyzy bar qalalar men astanada keminde 18 myń sharshy metr, óńirlerde 9 myń sharshy metr turǵyn úıler salý jáne keminde úsh jyl ǵımaratty salý tájirıbesi bolýy kerek. Sońǵy eki qarjy jylyndaǵy qyzmeti de shyǵynsyz bolýy shart. Budan basqa, qaryzdyq jáne menshikti kapıtalda araqatystylyǵy jeti paıyzdan aspaýy kerek», - dedi Ulttyq ekonomıka vıtse-mınıstri Marat Qusaıynov.
Budan bólek, qurylys salýshylarǵa turǵyn úı ǵımaratyn salý tájirıbesinen bólek, menshik nemese memleket bergen jer paıdalaný quqyǵynda aýyrtpalyqsyz jer ýchaskesiniń bolýy, jobalyq-smetalyq qujattamanyń bolýy talap etiledi.
Jalpy alǵanda, úleskerlerdiń qarajatyn tartý qurylys salýshynyń óziniń jeke qarajaty esebinen turǵyn úı ǵımaratynyń qańqasyn turǵyzǵannan keıin ǵana múmkin bolady.
Sonymen qatar úlestik turǵyn úı qurylysynyń tıimdiligin qamtamasyz etý maqsatynda zań jobasymen Úkimettiń, jergilikti atqarýshy organnyń, ýákiletti organnyń quzyretteri belgilenedi. Sonymen qatar, qujatta úleskerlerdiń quqyqtary men mindetteri, taraptardyń turǵyn úı qurylysyna úlestik qatysý týraly shart boıynsha mindettemeleri men jaýapkershilikteri retteledi.
Parlament qabyldaǵan zań Memleket basshysynyń qol qoıýyna joldanady.
