«Turǵyn úı qurylysyna kepildik berý» AQ resmı túrde tanystyryldy
ASTANA. QazAqparat - Búgin Astanada «Báıterek» holdıngi óz enshiles uıymy - «Qazaqstannyń ıpotekalyq kredıtterge kepildik berý» AQ negizinde qurylǵan «Turǵyn úı qurylysyna kepildik berý» aktsıonerlik qoǵamyn resmı túrde tanystyrdy.
Memleket basshysy 2016 jylǵy 7 sáýirde «Turǵyn úı qurylysyna úlestik qatysý týraly» Zańǵa qol qoıdy. Búgin, 13 qazanda, Zań kúshine endi jáne úlestik turǵyn úı qurylysyn uıymdastyrýdyń 3 tásilin kózdeıdi: Kepildik berý qorynyń kepildigin alý; ekinshi deńgeıdegi banktiń jobaǵa qatysýy; qurylys salýshynyń jeke qarajaty esebinen turǵyn úı ǵımaratynyń qańqasy turǵyzylǵannan keıin úleskerlerdiń aqshasyn tartý, dep habarlaıdy «Báıterek» ulttyq basqarýshy holdıngi» AQ baspasóz qyzmeti.
Úlestik salymdarǵa kepildik berý júıesin qurý úshin QR Úkimetiniń qaýlysymen «Báıterek» holdınginiń enshiles uıymy - «Qazaqstannyń ıpotekalyq kredıtterge kepildik berý» AQ Turǵyn úı qurylysyna kepildik berý qory bolyp aıqyndaldy.
Qor ótinimderdi qabyldaýdy bastaıdy jáne qurylys salýshy qabyldaǵan mindetterin oryndamaǵan jaǵdaıda, jarǵylyq mindetterge sáıkes turǵyn úı ǵımaratynyń aıaqtalýy boıynsha úleskerlerge kepildik beredi.
«Bizdiń basty maqsatymyz - qysqa merzimde tanymal bolý, múmkindikterimizdi keńeıtip, óz kásibı biliktiligimizdi arttyrý. Biz aldymyzǵa ór maqsatty, aýqymdylyǵy jaǵynan asa úlken mindet qoıdyq - bul úleskerlerdiń aqshasyn tartý esebinen salynyp jatqan turǵyn úıdiń 50 %-nan astamyn Qordyń kepildigimen qamtamasyz etý», - dedi «Turǵyn úı qurylysyna kepildik berý» AQ Basqarma Tóraǵasy Dáýren Ońaev.
Jańa tetik boıynsha kepildik berý jaǵdaılary mynalar bolyp tabylady: turǵyn úılerdi paıdalanýǵa tapsyrý merzimderin buzý; qarajatty maqsatsyz paıdalaný; sottyń sheshimi boıynsha qurylys salýshynyń dármensizdigi.
«Bastapqy kezeńde qurylys salýshynyń ótinimin qaraý kezinde Holdıngtiń enshiles uıymy, «Turǵyn úı qurylysyna kepildik berý qory» jańa Zań talaptarynyń sáıkestigine qurylys salýshyny tekseretin bolady. Barlyq talaptarǵa sáıkestigi anyqtalǵan jaǵdaıda, Qor qurylys salýshymen jáne Ýákiletti kompanııamen kepildik berý týraly shart jasasady. Qor táýelsiz ınjınırıngtik kompanııa arqyly úleskerlerdiń aqshasyn maqsatty paıdalanýyn baqylaıdy, ınjınırıngtik kompanııa, óz kezeginde, turǵyzylyp jatqan úılerdiń sapasyn baqylaıtyn bolady», - dep atap ótti Dáýren Ońaev.
Qordyń kepildigi úleskerler salymdarynyń saqtalýyn jáne úlesker úshin eń basty básekelestik basymdyq - belgilengen merzim ishinde qurylystyń kepildikti aıaqtalýyn qamtamasyz etedi. Qurylys salýshy úshin - ınvestorlar tarapynan senimniń joǵarylaýy esebinen satý kólemderiniń ulǵaıýyn, úleskerlerdiń aqshasyna tikeleı qoljetimdilik esebinen qarjylandyrý qunynyń tómendeýin qamtamasyz etedi. Injınırıngtik kompanııanyń qurylys barysyn baqylaýyn kózdeıtin turǵyn úı qurylysyna kepildik berý turǵyzylatyn úılerdiń sapasyn arttyrýǵa múmkindik beredi.
