Turǵyn úı qurylysyna qatysty máseleler talqylandy - Senat
ASTANA. QazAqparat - Búgin Parlament Senaty Ekonomıkalyq damý jáne kásipkerlik komıtetiniń depýtattary Óńirlik damý mınıstrliginiń basshylyǵymen kezdesti. Onda turǵyn úı qurylysy jáne turǵyn úı-kommýnaldyq sharýashylyq salalaryndaǵy zańnamalardy iske asyrý máseleleri talqylanyp, depýtattar «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasymen tanysty.
Jıyn barysynda komıtet tóraǵasy Talǵatbek Abaıdildın Elbasy Nursultan Nazarbaevtyń bıylǵy Joldaýynda qoljetimdi turǵyn úı baǵdarlamasynyń júzege asyrylýyna erekshe nazar aýdarylǵanyn aıtyp ótti.
«Turǵyn úımen qamtý Prezıdent alǵa qoıyp otyrǵan áleýmettik salada halyqtyń ómir súrý deńgeıin arttyrýdaǵy basym baǵyttardyń biri», -dedi senator.
Sonymen qatar, kezdesý barysynda talqylanǵan zań jobasy sheńberinde Ákimshilik quqyq buzýshylyq týraly kodeksine, «Memlekettik baqylaý jáne qadaǵalaý týraly», «Turǵyn úı qatynastary týraly» zańdarǵa jáne «Qoljetimdi turǵyn úı - 2020» baǵdarlamasyna ózgerister men tolyqtyrýlar engizý qajettigi aıtyldy. Budan bólek, qurylys salasynyń normatıvtik bazasyn reformalaý, turǵyn úı-kommýnaldyq sharýashylyǵyn damytý qory qyzmetiniń perspektıvalary týraly da áńgime órbidi.
