Turǵyn úı qurylysyna 22,4 mlrd teńge bólindi - Qostanaı oblysy
QOSTANAI. QazAqparat - Sońǵy úsh jylda Qostanaı oblysynda turǵyn úı qurylysyn qarjylandyrý 5 esege ósken. Bul týraly ákimdikte ótken jıynda oblystyq qurylys, sáýlet jáne qala qurylysy basqarmasynyń basshysy Talǵat Bolatov málimdedi, dep habarlaıdy QazAqparat.
Vedomstvo basshysy aıtqandaı, sońǵy 10 jylda turǵyndardy baspanamen qamtamasyz etý úlesi 30%-ǵa artqan. Búginde baspanamen qamtý kórsetkishi bir adamǵa 21,8 sharshy metrden keledi.
«Atalmysh kórsetkishti 2030 jyly 30 sharshy metrge deıin jetkizý kerek. Árbir otbasyna baspana alýdyń jańa múmkindikterin berý týraly «Prezıdenttiń bes áleýmettik bastamasy» atty úndeýinde basa aıtylǵan. Osy mindetti oryndaý barysynda biz turǵyn úıdi paıdalanýǵa berýdi jyl saıyn 10%-ǵa ósirýimiz qajet. Bıyl 269 myń sharshy metr turǵyn úı el ıgiligine berilmek. Jalpy, sońǵy úsh jylda Qostanaı oblysynda turǵyn úı qurylysyn qarjylandyrý 5 esege ulǵaıdy», - dedi Talǵat Bolatov.
Aıta keteıik, Qostanaı oblysynda turǵyn úı salý sońǵy jyly áldeqaıda joǵary qarqyn aldy. Byltyr 2164 páter jáne 482 jeke turǵyn úı qoldanysqa berildi. Baspanalardyń jalpy aýmaǵy 264,7 myń sharshy metrge teń. Oblys bul nátıje boıynsha respýblıkada úshinshi orynda keledi.
Óńir basshysy Arhımed Muhambetov qurylys salýdyń jańa ádisterin qarastyrýdy tapsyrdy.
«Qazir «Nurly jol» baǵdarlamasynyń barlyq baǵyty boıynsha qarjylandyrý kózderi tabyldy. Máselen, bıyl biz turǵyn úı qurylysy salasyna 22,4 mlrd teńge bóldik. Menińshe, atalǵan qarjy jyl sońyna deıin 30 mlrd teńgege jetedi. Investıtsııa tetikterin qarastyryp jatyrmyz»,- dedi Arhımed Muhambetov.
