Turǵyn úı qurylysyn kepildendirý qory úlestik qurylysty damytpaq

NUR-SULTAN. QazAqparat - Búgin elordada Qazaqstan men Koreıanyń turǵyn úı qurylysyn kepildendirý qorlary ekijaqty yntymaqtastyqty odan ary damytý máselelerin talqylady, dep habarlaıdy QazAqparat tilshisi.

«Turǵyn úı qurylysyn kepildendirý qory» AQ basqarmasynyń tóraǵasy Dýlat Jarlyqapov pen Korea Housing and Urban Guarantee Corporation prezıdenti Lı Chae Kvangtyń qatysýymen ótken shara barysynda taraptar munan ary da tıimdi yntymaqtastyqty jalǵastyrýǵa múddeli ekendikterin bildirdi. Eki eldiń qorlary arasynda 2018 jyly rásimdelgen Ózara túsinistik týraly memorandým aıasynda da birlese jumys isteýge nıetti ekendikterin atap ótti.

«Búginde qurylysshylar úshin «Báıterek» holdınginiń baspana blogy usynatyn ózge de baǵyttarǵa qatysa otyryp, bizdiń kepilimizdi paıdalanýdyń óte qolaıly múmkindikteri ashylyp otyr», - dedi Dýlat Jarlyqapov.

Aıta keterligi, buǵan deıin Qazaqstannyń Turǵyn úı qurylysyn kepildendirý qory Ońtústik Koreıadan kepildendirý qorynan kepil alý arqyly úleskerlerdiń aqshasyn tartýdy qalaıtyn qurylysshylarǵa talaptardy jeńildetý tájirıbesin alǵan bolatyn.