Turǵyn úı qurylysy salasyndaǵy materıaldardyń úlesi 90%-ǵa jetkiziledi - mınıstrlik

NUR-SULTAN. QazAqparat – Indýstrııa jáne ınfraqurylymdyq damý mınsıtrligi eldegi turǵyn-úı qurylysy salasyndaǵy qurylys materıaldarynyń úlesin 90%-ǵa jetkizbek, dep habarlaıdy QazAqparat tilshisi.

«Qazaqstandyq qamtý úlesi 90%-dy quraıtyn «Nurly jol», «Nurly jer» jáne «Jumyspen qamtý» jol kartasynyń 3,7 mlrd teńgelik 6 202 ınfraqurylymdyq jobasy iske asyrylýda. Sonymen qatar qurylys materıaldaryn shyǵarý boıynsha 33 joba júzege asyrylyp jatyr. Osynyń esebinen ımport úlesin 15%-ǵa azaıtý jáne turǵyn-úı qurylysynda 90%-ǵa deıin otandyq qurylys materıaldaryn paıdalaný josparlanýda», - dedi Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda.

Mınıstrdiń aıtýyna qaraǵanda, qurylys salasynda qazaqstandyq qamtý úlesin ulǵaıtý boıynsha naqty sharalar qabyldanyp jatyr. Birinshiden, bıýdjet qarajaty esebinen qarjylandyrylatyn jobalarda otandyq materıaldardy mindetti túrde qoldaný boıynsha quqyqtyq baza qurylǵan. Ekinshiden, saraptamadan ótken barlyq jobalardyń jıyntyq resýrstyq vedomostary engizilgen portal ázirlengen.

«Úshinshiden, memlekettik satyp alýdy iske asyrý týraly erejelerge otandyq taýar óndirýshiler tizilimine sáıkes materıaldardy satyp alýǵa mindetteıtin qurylys salasyndaǵy úlgi sharttaryna tolyqtyrýlar engizildi. Tórtinshiden, otandyq taýar óndirýshilerdiń talaptaryn oryndamaǵany úshin jaýapkershilikti kúsheıtý boıynsha quqyqtyq sharalardy pysyqtap jatyrmyz», - dedi ol.