Turǵyn úı qurylysy: Qandaı óńirler qarajatty ıgere almady

NUR-SULTAN. QazAqparat - Elordada qurylys qarqynynyń tómendeýi saldarynan respýblıka boıynsha jyldyq jospar oryndalmaýy múmkin. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Respýblıka boıynsha jyldyq jospar 13 mln sharshy metrdi quraıdy. Degenmen, 10 aıdyń qorytyndysynda Nur-Sultan qalasynda turǵyn úıdi paıdalanýǵa berý qarqyny 35,8 paıyzǵa tómenýine baılanysty josparlanǵan kólemge jete almaı qalýymyz múmkin», - dedi Beıbit Atamqulov.

Onyń aıtýynsha, bıyl turǵyn úılerdi ýaqytyly paıdalanýǵa berý úshin qurylys alańdaryna ınjenerlik-kommýnıkatsııalar ótkizýge 77,3 mlrd teńge bólindi. 10 aıdyń qorytyndysy boıynsha, qarjylandyrý josparyna sáıkes óńirlerge 59,3 mlrd teńge aýdaryldy. Onyń 56,3 mlrd teńgesi nemese 96 paıyzy ıgerildi.

«Túrkistan, Batys Qazaqstan, Qaraǵandy oblystarynda qarajattyń ıgerilý kórsetkishi tómen. Sot protsesteri men jobalaý-smetalyq qujattamanyń túzetilýine baılanysty birqatar óńir bólingen qarajatty jyldyń sońyna deıin qaıtarýdy josparlap otyr. Satyp alý quqyǵynsyz jalǵa beriletin baspana boıynsha jobalardy iske asyrý kezinde Pavlodar, Mańǵystaý, Atyraý oblystarynyń ákimdikteri bólingen qarajatty tolyq ıgermedi», - dedi mınıstr.