«Turǵyn úı qurylys jınaq bankiniń» jańa basshysy otbasy múshelerine páter bere almaıtyn boldy
ALMATY. QazAqparat - Búgin «Turǵyn úı qurylys jınaq banki» janyndaǵy Qoǵamdyq keńestiń osy jyldaǵy alǵashqy otyrysy ótti, dep habarlaıdy QazAqparat tilshisi atalǵan banktiń baspasóz hatshysy Aıbar Oljaıdyń sózderine silteme jasaı otyryp.
«Qoǵamdyq keńes otyrysynda birneshe másele talqylandy. Atap aıtqanda, «Nurly jer» memlekettik baǵdarlamasynyń negizgi maqsaty, mindeti, mehanızmi týraly Qoǵamdyq keńes múshelerine baıandap berildi. Sonymen qatar, bıylǵy jyly banktiń atqaratyn jumystary, sapany jaqsartýdaǵy tehnologııalyq sheshimder jáne keıbir qarjylaı jeńildikterdi odan ary jalǵastyrý máselesi qarastyryldy», - dedi Aıbar Oljaı.
Sondaı-aq, ol Qoǵamdyq keńeste sońǵy ýaqytta basylymdarda jarııalanǵan bank bedeline nuqsan keltiretin aqparattar da talqylanǵanyn aıtty.
«Úshinshi suraq retinde búgingi jıynda túrli basylymdarda jarııalanyp, bank bedeline nuqsan keltirgen aqparattar jóninde áńgime boldy (Burynǵy bank basshylyǵynyń týysqandaryna zańsyz páterler úlestirýi - red). Osy másele boıynsha, banktiń jańa basshysy Lázzat Ibragımova, banktiń jańadan saılanǵan orynbasary Ádilet Qojambaev ózderi bankte jumys isteý barysynda otbasy múshelerin páter alý jónindegi memlekettik baǵdarlamaǵa qatystyrmaý jóninde daıyndalǵan qujatqa óz erikterimen qol qoıdy. Sonymen birge, bank basshysy tek qana, onyń otbasy músheleri, ıaǵnı balalary jáne joldasy ǵana emes, aǵalary men sińililerin de memlekettik baǵdarlamaǵa qatystyrmaý týraly oıyn aıtyp, memlekettik baǵdarlamaǵa qatyspaıtyn týysqandarynyń tizimin keńeıtti», - dedi Aıbar Oljaı.
Bank baspasóz hatshysynyń aıtýynsha, búgin Qoǵamdyq keńeske bank taǵy bir usynys aıtqan.
«Bank basshysy páter alý týraly memlekettik baǵdarlamaǵa otbasy múshelerin qatystyrmaý týraly qujatqa otbasy múshelerinen bólek, týysqandary ıaǵnı, aǵalary, sińililerin de qatystyrmaý týraly usynysty banktiń qyzmettik etıka týraly qujatyna engizýdi usyndy. Alaıda, Qoǵamdyq keńes ol usynysty qabyldaǵan joq. Sebebi, atalǵan tulǵalar otbasy múshelerine kirmeıdi. Qoǵamdyq keńes bul sheshim olardyń konstıýttsııalyq quqyǵyn buzady degen sheshimge keldi. Sondyqtan, ol usynys banktiń qyzmettik etıkasyna engizilmeıtin boldy. Alaıda, bank basshysy ózine qatysty qujatqa qol qoıdy», dedi Aıbar Oljaı.
