Turǵyn úı qurylys jınaq bankiniń ıpotekalyq zaemdary ósti
ASTANA. QazAqparat - Búgin «Báıterek» holdınginiń Basqarma tóraǵasynyń mindetin atqarýshy Aıdar Áriphanovtyń tóraǵalyq etýimen ótken «Qazaqstannyń Turǵyn úı qurylys jınaq banki» AQ Dırektorlar keńesiniń otyrysynda bank basshylyǵy birinshi jartyjyldyqtaǵy qarjy ınstıtýtynyń jumys nátıjeleri boıynsha esep berdi, dep habarlaıdy QazAqparat.
«Eseptik kezeń nátıjeleri boıynsha TÚQJB halyqtyń uzaq merzimdi salymy naryǵynda 1-orynda tur. Jınaq aqshasynyń jalpy kólemi 464 mlrd teńgege nemese ekinshi deńgeıli bankter arasynda jalpy depozıt qorjynynyń 28 paıyzyna teń»,-dep atap ótilgen baspasóz qyzmetiniń málimetinde.
Turǵyn úı qurylys jınaq bankiniń basqarma tóraıymy Lázzat Ibragımova kórsetkishterdiń jaqsarýyna halyqtyń turǵyn úı jınaq qurylys júıesine degen seniminiń artýymen qatar, 2017 jyldyń sáýir aıynda kelisimsharttar bekitýdegi komıssııanyń alynyp tastalǵanynyń da yqpal etkenin atap ótti. Osy jyldyń tórtinshi aıynda 58 390 adam jańa depozıt ashqan, al 2016 jyldyń balama kezeńinde bul kórsetkish 20 310-ǵa teń bolatyn. Jalpy alǵanda birinshi jartyjyldyqtyń nátıjesi boıynsha TÚQJB-da 201 523 jańa kelisimshart ashyldy. Bul 2016 jyldyń alǵashqy 6 aıymen salystyrǵanda eki ese derlik kóp.
Eseptik kezeń ishinde Qazaqstandaǵy turǵyn úı qurylysy men baspana satyp alýǵa berilgen zaemdar kólemi 155 mlrd teńgeni qurady, onyń 117 mlrd teńgesin TÚQJB bólip otyr. Bul búkil el boıynsha resimdelgen barlyq ıpotekalyq zaemdardyń 75,4 paıyzyna teń. Turǵyn úı qurylys jınaq banki usynatyn nesıelerge degen mundaı suranystyń qalyptasýyna ekinshi deńgeıli bankter belsendiliginiń halyqty nesıelendirý naryǵyndaǵy birqalypty ǵana damýy, jyljymaıtyn múlik baǵasynyń turaqtalýy jáne «Nurly jer» memlekettik baǵdarlamasynyń júzege asyrylýy áser etti.
«TÚQJB nesıe qorjyny 14,2 paıyzǵa artyp, 6 aı qorytyndysy boıynsha 377,3 mlrd teńgeni qurady. Bul rette banktiń basqa ekinshi deńgeıli bankter arasynda sapasy eń joǵary nesıe qorjynyna ıe bolyp otyrǵanyn aıta ketý kerek. Turǵyn úı qurylys jınaq bankiniń NPL-y (tólenbegenine 90 kúnnen astam ýaqyt ótip ketken zaemdar) 0,41 paıyzdy quraıdy, al qazaqstandyq bankter boıynsha ortasha NPL 10,7 paıyzǵa teń», - dep atap ótilgen taratylǵan málimette.
