Turǵyn úı qurylys jınaq bankiniń 120 myńnan astam salymshysy ótemaqy alýǵa eshqandaı nıet bildirmegen
Turǵyn úı qurylys jınaq banki ótemaqy tóleý úshin qosymsha kelisimderge qol qoıýdy 2016 jyldyń 1 maýsymynda aıaqtady. Qosymsha kelisimderge qol qoıý qorytyndysy boıynsha, 452 277 salymnyń 322 884-ine ótemaqy tólenetin bolady. Óıtkeni, 120 myńnan astam salymnyń ıeleri ótemaqy alýǵa eshqandaı nıet bildirmegen. Sonyń ishindegi 2 268 salymnyń jınaq somasy 1 mln. teńgeden asady. Nátıjesinde 54,5 mlrd. teńge kólemindegi ótemaqy tóleýge bólingen qarjynyń 94%-y ıgerildi. 3,5 mlrd. teńge suraýsyz qalyp otyr», - delingen habarlamada.
Turǵyn úı qurylys jınaq banki maýsymnyń 25-inen bastap ótemaqy tóleı bastady. Atalmysh protsess tamyzdyń 1-ine deıin júrgiziledi.
Turǵyn úı qurylys jınaq banki bıylǵy jyldyń 8 aqpanynan bastap qosymsha kelisimderge qol qoıý rásimderin bastaǵan edi. Bastapqyda «bul úderis 1 maýsymǵa deıin sozylady jáne 114 kúntizbelik kún ishinde ótedi» dep málimdelgen bolatyn. Alaıda, túrli sebeppen qosymsha kelisimge qol qoıýǵa úlgermeı qalǵan salymshylardyń kóptigine baılanysty, 31 mamyr kúni Turǵyn úı qurylys jınaq bankiniń Dırektorlar keńesi mejeli merzimdi taǵy bir aıǵa uzartqan edi. Osylaısha, rásimge 144 kúntizbelik kún bólindi.
Eske sala ketetin jaıt, ulttyq valıýta baǵamy túzetilgen soń byltyr Elbasy Nursultan Nazarbaev úkimetke Turǵyn úı qurylys jınaq salymshylarynyń jınaǵyn saqtap qalýdyń arnaıy tetikterin ázirleýge tapsyrma bergen bolatyn. Osyǵan oraı, byltyrǵy jyldyń sońynda Qarjy mınıstrligimen, Ulttyq ekonomıka mınıstrligimen, Investıtsııalar jáne damý mınıstrligimen, sondaı-aq QR Ulttyq Bankimen birlese otyryp, «Báıterek» Basqarýshy holdıngi ótemaqy tóleýdiń mehanızmin ázirlegen edi. Nátıjesinde, salymnyń 35,5% kóleminde ótemaqy belgilendi.
