Turǵyn úı qurylys jınaq bankinde qandaı ózgerister bolýy múmkin
«Memleket negizgi aktsıoner retinde qala beredi jáne bank óziniń barlyq áleýmettik qyzmetteri men mindettemelerin saqtap qalady. Bul týraly bıyl Astanada ótken Úkimet otyrysy barysynda Turǵyn úı qurylys jınaq banki basqarma tóraıymy Lázzat Ibragımova habarlady. Shara aıasynda memlekettik kásiporyndardyń jekeshelendirýin uıymdastyrý máselesi qarastyrylǵan bolatyn», - dep naqtylady atalǵan banktiń baspasóz qyzmeti.
«Memleket basshysy Joldaýynda Turǵyn úı qurylys jınaq banki júzege asyryp otyrǵan turǵyn úı qurylys jınaq júıesiniń tıimdiligin erekshe atap ótken bolatyn. Bul júıe halyqtyń úlken bóligi úshin baspanany qoljetimdi etip otyr. Qazirgi kezde bank izdestirip jatqan strategııalyq seriktes osy baǵyttaǵy jumysty jaqsartýǵa kómektesedi. Mundaı uıym retinde biz Turǵyn úı qurylys jınaq bankiniń ary qaraıǵy sapaly damýyn qamtamasyz etetin, halyqaralyq tájirıbesi bar, osy salada mamandanǵan, turaqty qarjy ınstıtýtyn kórip otyrmyz. Bul mámileden birinshi kezekte klıentterimiz utady, sebebi olar tehnologııalyq turǵydan damyǵan qyzmetti alyp, eń tıimdi degen ónimderdi paıdalanatyn bolady», - dep túsindirdi Lázzat Ibragımova.
Ol nesıelendirý mólsherlemelerine qatysty qazirgi qoldanystaǵy barlyq jeńildetilgen sharttar tolyq kólemde óz kúshinde qalatynyn atap ótti.
Aıta ketý kerek, ınvestordyń kelýi bank salymshylaryna beriletin memlekettik syılyqaqyǵa esh yqpal etpeıdi. Memlekettik syılyqaqyny tóleý normalary «Qazaqstan Respýblıkasyndaǵy turǵyn úı qurylysy jınaq aqshasy týraly» zańda bekitilgen.
Sonymen qatar, Turǵyn úı qurylys jınaq banki negizgi operator retinde «Nurly jer» memlekettik baǵdarlamasyn júzege asyrýǵa qatysýyn jalǵastyrady. Joba aıasynda ótken jyly Turǵyn úı qurylys jınaq banki arqyly 8 672 páterden turatyn 145 úı paıdalanýǵa berilgen bolatyn. Osy jyly 7 981 páterden turatyn 95 úı men Almaty, Jambyl, Soltústik Qazaqstan jáne Aqtóbe oblystaryndaǵy 414 jeke kottedj óz ıelerin tabady dep josparlanyp otyr.
