Turǵyn úı qurylys jınaq banki jeke baspana salýǵa 70 mlrd. teńge bólýge daıyn

Bul týraly búgin Úkimet otyrysynda QR Ulttyq ekonomıka mınıstri Qýandyq Bıshimbaev málim etti, dep habarlaıdy QazAqparat.

 Mınıstrdiń aıtýynsha, oblys ortalyqtarynda jeke menshik baspana qurylysyn  damytý úshin jańa ilki jobany qoldaný usynylady. Onyń negizgi mindetteri mynadaı: biryńǵaı qurylys salýshy arqyly biryńǵaı sáýlettik úlgide jeke turǵyn úı salý;  úı qurylysy kombınattarynyń tehnologııalaryn qoldaný arqyly turǵyn úı qunynyń qoljetimdiligin qamtamasyz etý; kezekte turǵan azamattarǵa Turǵyn úı qurylys jınaq bankinen jeńildikpen qaryz berý arqyly jeke turǵyn úı qurylysyn qarjylandyrý.

«Іlki jobaǵa qatysýshy kezekte turǵan azamattar jer ýchaskesimen birge jáne ınjenerlik-kommýnıkatsııalyq ınfraqurylym júrgizilgen daıyn úıdi ózderi satyp alýǵa nemese úıdi satyp alý úshin Turǵyn úı qurylys jınaq bankinen nesıe alýǵa quqyly. Búgingi kúni Turǵyn úı qurylys jınaq banki óziniń menshikti qarajaty jáne qaryz qarajatynyń esebinen 70 mlrd. teńgege deıin qaryz berýge daıyn. Túpkilikti qaryz alýshynyń syıaqy mólsherin 5 paıyzǵa deıin tómendetý úshin memleket ıpotekalyq nesıe berýdi qoldaý baǵyty aıasynda syıaqy qunynyń 7 paıyzyna deıin sýbsıdııa beretin bolady», - dedi ol.

Mınıstrdiń sózine qaraǵanda, osy tásil boıynsha kezekte turǵan azamattar úshin aı saıynǵy tólem alǵashqy 5 jylda 70 myń teńgeni, keıingi 10 jylda 56 myń teńgeni quraıtyn bolady.