Turǵyn úı qurylys jınaq banki jas otbasylarǵa arnap jalgerlik turǵyn úıdi satýdy bastaıdy
ASTANA. 9 qańtar. QazAqparat - 2013 jyldan bastap «Qazaqstannyń Turǵyn úı qurylys jınaq banki» AQ «Qoljetimdi baspana-2020» baǵdarlamasynyń jańa baǵyty - jas otbasylarǵa arnap jalgerlik turǵyn úı satyp alýdy bastaıdy. QR Premer-Mınıstri resmı saıtynyń habarlaýynsha, bul týraly búgin bank basqarmasynyń tóraıymy Nurbıbi Naýryzbaeva «Qazaqstannyń Turǵyn úı qurylys jınaq banki» AQ Ortalyq fılıalynyń ashylýyna arnalǵan baspasóz konferentsııasynda málim etken.
«2013 jylǵy basty maqsatymyz - «Qoljetimdi baspana-2020» baǵdarlamasynyń jańa baǵyty - jalgerlik turǵyn úı baǵytyn júzege asyrý. 2013 jyldyń 1 qańtarynan bastap memlekettik baǵdarlamanyń jas otbasylarǵa arnalǵan jańa baǵdarlamasy iske asyryla bastaıdy, ıaǵnı jas otbasylar úshin jáne azamattardyń nesıeni tóleı almaıtyn sanattary úshin jalgerlik turǵyn úıler satylyp alyna bastaıdy», - dedi N.Naýryzbaeva.
Ol bank búgingi kúni jańa baǵytty júzege asyrýǵa tolyǵymen daıyn, endi jergilikti atqarý organdarymen birlesip ózara árekettestiktiń túbegeıli tetikterin oılastyrýda ekenin aıtty. Sebebi qatysýshylar tizimi jergilikti atqarý organdary arqyly qalyptastyrylatyn bolady.
Sondaı-aq tóraıym, ústimizdegi jylǵy maqsattardyń qatarynda klıenttik bazany ulǵaıtýdy da atap ótti. 2013 jyly bank 90 myńnan astam jańa klıent tartyp, 50 mlrd. astam jańa zaemdar berýdi josparlap otyr.
Atap ótý qajet, 2012 jyly «Qazaqstannyń Turǵyn úı qurylys jınaq banki» AQ jalpy somasy 219,2 mlrd. teńge bolatyn 88 912 kelisim shart jasaǵan, al bank salymshylarynyń jınaqtarynyń jalpy kólemi bir jyl ishinde 80 paıyz ulǵaıyp, 129,85 mlrd. teńgeni quraǵan.
