Turǵyn úı qurylys jınaq banki klıentteri úshin birqatar komıssııany alyp tastady
ASTANA. QazAqparat – «Qazaqstan turǵyn úı qurylys jınaq banki» AQ klıentteri tóleýi tıis birqatar komıssııany alyp tastady, dep habarlady «Báıterek» holdınginiń basqarma tóraǵasy Qýandyq Bıshimbaev.
«Elbasynyń tapsyrmasymen turǵyn úı qurylys jınaq bankinde birqatar komıssııa alynyp tastaldy. Klıentter úshin qarjylaı júk salmaǵy 30% qysqardy. Turǵyn úılerden páter satyp alýshylar pýldaryna qatysýǵa ótinishterin bildirý úshin tóleıtin komıssııa, Baǵdarlamaǵa qatysýshynyń statýsy týraly qosymsha kelisim jasaý úshin tólenetin komıssııa joıyldy. Klıenttiń bastamasymen jınalǵan qarjy týraly sharttaǵy talaptardy ózgertý týraly qosymsha kelisim de tegin jasalatyn boldy. Buryn bul úrdister úshin klıent 5 myń teńgeden tóleıtin. Sonymen birge múlikti satyp alý/satý kezinde notarıýstyń qyzmeti buryn 22 myń teńge bolsa, qazir jańa kelisim boıynsha ol 7 myń teńgeden aspaıdy», - dedi Q.Bıshimbaev «Kazahstanskaıa pravda» gazetine bergen suhbatynda. Onyń derekterine qaraǵanda, turǵyn úı qurylys jınaq júıesine belsendi qatysýshylar sany 2014 jyly 4,25% ulǵaıdy. «Maqsatymyz – jyl sońyna deıin bul kórsetkishti 5% deıin jetkizý. Búginde turǵyn úı qurylys jınaq banki kópmerzimdik salymdar boıynsha birinshi orynda », - dedi holdıng basshysy. Onyń sózine qaraǵanda, «Qazaqstandyq ıpotekalyq kompanııa» AQ ıpotekalyq nesıelerdi alý úrdisin belsendi júrgizip ony 50 mıllıard teńgege deıin jetkizgen. «Ótken maýsymda, bankter ıpotekalyq naryqta belsendilikterin báseńdetkende, biz damý ınstıtýttary tarapynan belsendilikti arttyrýdy jón kórdik. Qazirgi tańda Turǵyn úı qurylys jınaq banki men Qazaqstandyq ıpotekalyq kompanııanyń baspanany qarjylandyrý naryǵyndaǵy úlesi 23% asty», - dedi Q.Bıshimbaev.
