«Turǵyn úı qurylys jınaq banki» qatysýymen salynǵan páterdiń sharshymetri 600-950 dollar aralyǵynda bolady - S. Nokın
ASTANA. Mamyrdyń 27-si. QazAqparat /Qanat Mámetqazyuly/ - Elimizde «Turǵyn úı qurylys jınaq banki» AQ-nyń qatysýymen salynǵan páterlerdiń sharshymetri 600-den 950 dollarǵa deıingi aralyqta bolady. Bul týraly búgin QR Parlamenti Senatynda «Turǵyn úı qurylys jınaq banki» júıesi arqyly Qazaqstan Respýblıkasynda turǵyn úı qurylysynyń memlekettik saıasatyn jetildirý» taqyrybynda ótken dóńgelek ústel barysynda Qurylys jáne turǵyn úı-kommýnaldyq sharýashylyq agenttiginiń tóraǵasy Serik Nokın málim etti,
dep habarlaıdy QazAqparat.
S. Nokınniń aıtýynsha, Agenttik pen «Turǵyn úı qurylys jınaq banki» birlese otyryp jeke ınvestorlar men jergilikti atqarýshy organdar arqyly turǵyn úılerdi paıdalanýǵa berý nobaıyn ázirlegen. Bul nusqaǵa oraı, «Turǵyn úı qurylys jınaq banki» sanatyna, belgilengen baǵasyna oraı turǵyn úılerdi satyp alǵysy keletin salymshylardy qalyptastyrady, al ákimdikter bundaı nysandar úshin ınjenerlik ınfraqurylymy tolyq jasaqtalǵan jer telimderin usynatyn bolady. Sonymen birge, ákimdikter respýblıkalyq bıýdjet kredıti esebinen turǵyn úılerdi salýdy júzege asyrady. Nysandar paıdalanýǵa berilgennen keıin, ákimdikter «TÚQJB» bank salymshylarymen satyp alý-satý kelisimderin jasaıtyn bolady. Jeke ınvestorlardyń qoldaýymen salynatyn úıler de týra osy úlgide júzege asady. «Jalpy, jergilikti ákimdikter turǵyn úı qurylysyna qatysty bundaı baǵytty qoldap otyr. Sonymen birge, úı baǵasyna keletin bolsaq, ákimdikterdiń málimetteri boıynsha Almaty qalasynda onyń sharshymetri shamamen alǵanda 142,5 myń teńgeniń nemese 950 dollardyń aınalasynda bolady. Astana men Aqtaý qalalarynda bul kórsetkish 112,5 myń teńge nemese 750 dollardy quraıdy. Elimizdiń basqa óńirlerinde bundaı jolmen salynǵan páterlerdiń sharshymetri 90 myń teńge nemese 600 dollar aınalasynda bolady», dedi S. Nokın.
