Turǵyn úı qurylys jınaq banki ıpoteka naryǵynyń 67 protsentin qamtyp otyr - Dosaev

ASTANA. QazAqparat - Turǵyn úı qurylys jınaq banki búginde Qazaqstannyń ıpoteka naryǵynyń 67 protsentin qamtyp otyr. Bul jaıynda búgin Astana ekonomıkalyq forýmy aıasynda ótken «Bıznestiń básekege qabilettiliginiń ósimi úshin jańa múmkindikter» atty sessııa barysynda «Báıterek» UBH» AQ-nyń basqarma tóraǵasy Erbolat Dosaev málim etti, dep habarlaıdy QazAqparat.

«Búgingi kúngi ıpoteka naryǵy jaıynda sóz qozǵar bolsaq, onda Turǵyn úı qurylys jınaq banki eldegi ıpoteka naryǵynyń 67 protsentin qamtyp otyr. Árıne, bul bir jaǵynan óte jaqsy kórsetkish jáne «Báıterektiń» jumys qorytyndysy. Biraq, sonymen qatar naryq úshin ózindik syn-qater desek te bolady. Biz bul baǵyttaǵy óz úlesimizdi aıtarlyqtaı tómendetýge tıispiz. Úlestiń basym bóliginiń ósimi ótken jyly bizdiń kóp qarjy salǵanymyzdan bolyp otyrǵan joq. Qarjy ortalyqtary retindegi jeke sektor biz kútkendeı qarjyny ekonomıkaǵa salyp otyrǵan joq», - dedi Erbolat Dosaev.

Osy rette holdıng basshysy uzaqmerzimdi ári arzan nesıeleý bıznes úshin búgingi kúni jáne bolashaqtaǵy tabystyń eń negizgi faktory sanalatyndyǵyn basa aıtty.

«Qazirgi ýaqytta kvazımemlekettik sektor, damý ınstıtýttary shyn máninde qajetti qorlandyrýdy qamtamasyz etetin qurylymdardyń birine aınalyp otyr. Biz mańyzdy memlekettik jáne úkimettik baǵdarlamalar boıynsha Úkimettiń operatory, janama sharalardy damytý ınstıtýttary sanalamyz», - dedi Erbolat Dosaev.