Turǵyn úı qurylys jınaq banki IFC-pen jańa júıedegi nesıe usynbaq
Endi bank klıentteri úzdik halyqaralyq tájirıbelerge negizdelgen júıemen nesıe alatyn boldy. Bul óz kezeginde myńdaǵan qazaqstandyqtyń baspana máselesin sheshýge arnalǵan qosymsha qural bolmaq.
«Turǵyn úı máselesi Qazaqstannyń turaqty órkendeýinde sheshýshi mánge ıe desek artyq emes. Al «Turǵyn úı qurylys jınaq banki» sekildi qarjy ınstıtýttary osy sektordyń damýyna yqpal etýde mańyzdy ról oınaıdy. Turǵyn úı qurylys jınaq banki Qazaqstannyń bank sektorynyń básekege qabilettiligin nyǵaıtý jáne Qazaqstandaǵy qarjylyq ınklıýzıvti qamtamasyz etýde bizge jaqsy seriktes bolyp otyr», - dedi Ortalyq Azııa boıynsha IFC basshysy Kassandra Kolbert.
Jańa nesıe ónimin daıyndaý birneshe kezeńge sozylmaq.
Jumys 2019 jyldyń sońyna qaraı aıaqtalady. IFC eń aldymen banktiń qazirgi qyzmetine analız júrgizip, sosyn klıentter bazasyn saralaıdy. Klıentterdiń qajettiligin túsiný úshin halyqaralyq sarapshylar olardyń jumysyn, tabys deńgeıin, qaı jerde turatynyn zertteıdi.
Búginde Qazaqstanda turǵyn úı qurylys jınaq júıesi baspanaly bolýdyń eń qoljetimdi ádisi bolyp otyr.
1 mıllıon eki júz myńnan astam qazaqstandyq osy júıege senim bildiredi. Bul - eldegi ekonomıkalyq belsendi halyqtyń 13,1%-y bolyp otyr.
«Osy ýaqytqa deıin 165 000 azamatqa turǵyn úı jaǵdaıyn jaqsartýǵa kómektestik. 2018 jyldyń 10 aıynda ǵana 30 500 otbasy biz arqyly baspanaly boldy. Al qazan aıynda 4 500 zaım resimdep, rekordtyq kórsetkishke qol jetkizdik. Baspanaly atanǵan salymshylar sany budan da kóp bolýy úshin Turǵyn úı qurylys jınaq banki halyqaralyq deńgeıge shyǵyp otyr. Bul qosymsha ınvestıtsııalarǵa jol ashady jáne turǵyn úı máselesin sheshýge arnalǵan jańa quraldardy engizýge múmkindik beredi. Mundaı qadamnan birinshi kezekte Turǵyn úı qurylys jınaq bankiniń klıentteri utady. Olarǵa burynǵydan da sapaly, kópjyldyq halyqaralyq tájirıbege negizdelgen qyzmetter usynylady, nátıjesinde salymshylarymyz tıimdi jolmen baspana ala aladyı, - dedi Turǵyn úı qurylys jınaq bankiniń tóraıymy Lázzat Ibragımova.
Bank ónimderin jetildirý - Turǵyn úı qurylys jınaq bankiniń 2023 jylǵa deıingi damý strategııasynda kórsetilgen maqsattarǵa jetýdegi negizgi mindetteriniń biri. Bul kezeńge qaraı bank klıentke baǵdarlanǵan qarjy ınstıtýty atanyp qana qoımaı, joǵary tehnologııalyq uıymǵa aınalýy tıis. Osy jyly atalǵan baǵytta úlken jumystar atqaryldy jáne qashyqtan qyzmet kórsetý servısterine basa mán berildi.
Máselen, 2018 jyldyń mamyr aıynda depozıtterdi basqa adamnyń atyna onlaın jolmen aýdarýǵa múmkindik beretin jańa aýktsıon qyzmeti qosyldy. Bul joba júzege asyrylǵaly beri 2 104 salym satyldy. Iesi ózgergen depozıtterdegi jalpy jınaq somasy 4 mlrd teńgeni qurady, ıaǵnı osyndaı soma turǵyn úı qurylys jınaq júıesinde qalyp, turǵyn úıge muqtaj jandarǵa baspanaly bolýǵa kómektesti.
2018 jyldyń shilde aıynda bank vıdeo arqyly keńes berý qyzmetin iske qosty. Atalǵan servıs arqyly klıentter menedjermen beınebaılanys ornatyp, Turǵyn úı qurylys jınaq bankiniń barlyq qyzmetteri boıynsha qashyqtan keńes ala alady.
