Turǵyn úı qurylys jınaq banki «5-5-25» baǵdarlamasyn engizbek
«2017 jyldan bastap «Nurly jer» turǵyn úı qurylysy baǵdarlamasy júzege asyrylýda, oǵan óńirlik damý baǵdarlamalary men «Nurly jol» baǵdarlamasy boıynsha turǵyn úı qurylysyna qatysty barlyq máseleler biriktirilgen. Memleket basshysynyń sońǵy tapsyrmalaryna baılanysty «Nurly jer» baǵdarlamasyna ózgerister engizýdi josparlap otyrmyz, onda turǵyn úı qurylysynyń kólemin ulǵaıtý normalary qarastyrylatyn bolady», - dedi atalǵan saıtqa bergen suhbatynda Marhabat Jaıymbetov.
Sondaı-aq ol «Turǵyn úı qurylys jınaq bankiniń» turǵyn úı nesıeleri «7-20-25» jańa baǵdarlamasynyń parametrleri boıynsha qaıta qaralatyndyǵyn da aıtty.
«Budan ózge, «Turǵyn úı qurylys jınaq bankiniń» áskerı qyzmetkerler men arnaıy memlekettik organdardyń qyzmetkerlerine arnalǵan «5-5-25» baǵdarlamasyn; «Turǵyn úı qurylys jınaq bankiniń» nesıelik turǵyn úı satyp alýǵa arnalǵan «5-20-15» baǵdarlamasyn engizý josparda bar. Túsindirip óteıin, bank salymshylaryna bank shotynda kem degende 20% qarajat bolǵan jaǵdaıda, 15 jylǵa deıingi nesıelik merzimge 5%-ben nesıe beriledi.
Sonymen qatar, Baǵdarlama ózgeristeri aıasynda jergilikti atqarýshy organdardyń nesıelik páterlerin tek Turǵyn úı qurylys jınaq bankiniń salymshylary ǵana emes, sondaı-aq jeke bankterdiń klıentteriniń de satyp alý múmkindigi qarastyrylýda.
Bul jaǵdaılar ákimdikter salyp jatqan baǵalyq parametrlerge baılanysty ıpotekany damytýǵa úlken serpin beredi. Bul óńirlerde 140 myń teńge, Astana, Almaty, Atyraý jáne Aqtaý qalalarynda - 180 myń teńge (salynyp jatqan turǵyn úı 3 aıdyń ishinde bank salymshylaryna ótkiziledi jáne satylmaǵan turǵyn úıdiń qalǵany - EDB klıentterine satylady).
Atalǵan baǵdarlamaǵa jeke qurylys salýshylardyń belsendi qatysýy úshin olardyń turǵyzǵan úı-jaılaryn jergilikti atqarýshy organdar (nesıelik turǵyn úı qurylysyna bólingen qarajat jáne satyp alý quqyǵynsyz arendalyq turǵyn úı qarajaty esebinen) satyp ala alady.
Turǵyn úı qurylysyn qarjylandyrý joldaryn nemese memlekettik kásiporyndardyń ózderiniń qyzmetkerlerine bastapqy jarnamen turǵyn úı qaryzdaryn berý joldaryn qarastyramyz.
Sonymen qatar, jeke qurylys salýshylarǵa qurylys alańdaryn daıyndaý úshin, biz Qarjy mınıstrligimen birlesip turǵyn úı qurylysy aýdandaryna ınjenerlik kommýnıkatsııalar qurylysyn qarjylandyrýdy 80 mlrd teńgeden 100 mlrd teńgege deıin ulǵaıtý máselesin qarastyryp jatyrmyz», - dedi Komıtet tóraǵasy.
