Turǵyn úı-kommýnaldyq sharýashylyǵyn jańǵyrtý baǵdarlamasyna ózgerister engizilýi múmkin

ASTANA. 1 qazan. QazAqparat - Mınıstrler kabınetiniń búgingi otyrysynda Premer-Mınıstr Serik Ahmetov turǵyn úı-kommýnaldyq sharýashylyǵyn jańǵyrtý baǵdarlamasyna sý jáne kárizdik jelilerdi jóndeý máselesin engizýdi qoldady.

Úkimet otyrysynda «Sý resýrstary - marketıng» JShS (Shymkent sý arnasy) bas dırektory Anarbek Ormanov baıandama jasap, Shymkentte abonenttik tólem aqshasyna biraz sý jelileriniń jóndelgenin jetkizdi. «Qala turǵyndarynyń barlyǵy derlik sýdy esepteý qurylǵylarymen qamtylǵan. Sonyń arqasynda bir adamnyń aýyz sýdy tutyný kórsetkishi táýligine 450 lıtrden 114 lıtrge deıin tómendegen. Sóıtip, árbir adam bir aıda 700 teńgege jýyq aqshany únemdeıdi. Sondaı-aq elektr energııany tutyný kólemi de tórt esege azaıdy», - deıdi A.Ormanov. Mekeme basshysy atap kórsetkendeı, búginde turǵyn úı-kommýnaldyq sharýashylyǵyn jańǵyrtý baǵdarlamasy aıasynda kóppáterli úılerdi jóndeýge qyrýar qarajat bólinedi. Alaıda sý jáne kárizdik qubyrlardy jóndeý jumysy odan tys qalyp otyr. Osyǵan oraı, A.Ormanov sý jelisi máselesin atalǵan baǵdarlamaǵa engizip, bıýdjetten tıisti qarjyny nesıe retinde berýdi usyndy. Úkimet basshysy S.Ahmetov bul usynysty qoldady. «Negizi, sýmen qamtamasyz etý jáne kárizdik jeliler máselesin memlekettik baǵdarlamaǵa engizgen jón. Sebebi olar (monopolıster - avt.) jaı bıýdjet aqshasyn emes, bıýdjettik nesıeni surap otyr ǵoı. Kóreıik», - dedi Premer-Mınıstr.