Turǵyn úı kommýnaldyq sharýashylyǵyn jańǵyrtý baǵdarlamasy boıynsha 67 joba júzege asady
ASTANA. 19 naýryz. QazAqparat - Turǵyn úı kommýnaldyq sharýashylyǵyn jańǵyrtý baǵdarlamasy sheńberinde 2012 jylǵy ákimdikter 12,2 mlrd. teńgeni quraıtyn 67 jobany usynyp otyr.
Bul týraly búgin Parlament Májilisinde ótip jatqan Úkimet saǵatynda Qurylys jáne turǵyn úı kommýnaldyq sharýashylyq isteri agenttiginiń tóraǵasy Serik Nokın málim etti.
Agenttik basshysynyń aıtýynsha, byltyr turǵyn úı sektorynda 284 shaqyrym jylýmen, elektrmen jáne gazben jabdyqtaý jelileri jańǵyrtylǵan. Bul maqsatqa respýblıkalyq bıýdjetten 7 mlrd. teńge qarajat bólinip, 43 joba iske asyrylǵan.
«Al, 2012 jylǵa ákimdikter tarapynan 12,2 mlrd. teńge somasyndaǵy 67 jobany júzege asyrý usynylyp otyr»,-dedi S. Nokın.
Sondaı-aq, agenttik tóraǵasynyń aıtýynsha, «Aqbulaq» salalyq baǵdarlamasy sheńberinde byltyr 54,7 mlrd. teńgege 103 qalalyq sýmen jabdyqtaý jáne sý burý jobasy, 28,7 mlrd. teńgege 257 aýyldyq jerdiń sýmen jabdyqtaý jobasy iske asyrylǵan.
«2012 jyly jalpy somasy 43,3 mlrd. teńgeni quraıtyn 102 qalalyq sýmen jabdyqtaý jobasy, sondaı-aq jalpy somasy 33,9 mlrd teńge bolatyn 232 aýyldyq sýmen jabdyqtaý jobasyn júzege asyrý josparlanyp otyr»,-dedi S. Nokın.
