Turǵyn-úı kommýnaldyq sharýashylyǵyn jańǵyrtý baǵdarlamasy aıasynda 2013 jyly Astana boıynsha 1,6 mıllıard teńge bólý kózdelýde

Bul jóninde búgin Astana qalasynda turǵyn-úı kommýnaldyq sharýashylyǵyn jańǵyrtý baǵdarlamasy nysandaryna jasalǵan baspasóz týry kezinde elorda ákimdiginiń baspasóz qyzmeti málim etti.

QR Turǵyn-úı kommýnaldyq sharýashylyǵyn jańǵyrtý baǵdarlamasy aıasynda, 2011-2012 jyldary 10 kóppáterli úı kúrdeli jáne 9 úı aǵymdyq jóndeýden ótken. Sonymen qatar 5 eski lıft aýystyrylǵan. Bunyń barlyǵyna respýblıkalyq bıýdjetten 776 mıllıonnan astam teńge jumsalǵan. 

«Kóppáterli turǵyn úılerdi kúrdeli jóndeýden ótkizý kezinde biz onda ınjenerlik jelilerdi tolyǵymen aýystyrdyq. Ol jerdegi jertóleler, jylýǵa ketetin shyǵyndardy áldeqaıda tómendetýge múmkindik beretin jylytý pýnktary ornatyldy, elektrojabdyqtaý qurylymdary, shatyrlary, kireberisteri jańartylyp, balalarǵa arnalǵan oıyn alańdary salyndy», - deıdi Astana qalasy Almaty aýdany ákiminiń orynbasary Álıhan Qýatbekov.

Qurylys jáne turǵyn-úı kommýnaldyq sharýashylyǵy agenttiginiń málimetteri boıynsha, Qazaqstanda kóppáterli turǵyn úılerdiń 32 paıyzy kúrdeli jóndeýdi talap etedi. Bul - elimizdegi turǵyn úı qorynyń úshten biri. Atalmysh baǵdarlama aıasynda 10 jylda 11624 turǵyn úıdi jóndeýden ótkizý josparlanýda.