Turǵyn úı-kommýnaldyq sharýashylyǵyn keń aýqymda jańǵyrtýdyń 2020 jylǵa deıingi jospary maýsymnyń 1-ine deıin qaraýǵa usynylady - Agenttiktiń jaýapty hatshysy
ALMATY. Naýryzdyń 2-si. QazAqparat /Erlik Erjanuly/ - Turǵyn úı-kommýnaldyq sharýashylyǵyn keń aýqymda jańǵyrtýdyń 2020 jylǵa deıingi baǵdarlamasyn ázirleýde 4 negizgi baǵyt aıqyndaldy.
Bul búgin Almatyda «Atakent» iskerlik yntymaqtastyq ortalyǵyndaǵy jańa kórme maýsymynyń ashylý rásimine arnalǵan baspasóz máslıhatynda aıtyldy, dep habarlaıdy QazAqparat.
«Qazirgi tańda respýblıkadaǵy sý qubyry jelisiniń 68 paıyzy, jylý júıesiniń 70 paıyzynyń tozyǵy jetken. Ǵımarattarda jylýdyń 35 paıyzy, sý qubyry jelisinde sýdyń 32 paıyzy shyǵyn bolýda. Elbasy Qazaqstan halqyna arnaǵan bıylǵy Joldaýynda 2011 jylǵa deıin turǵyn úı-kommýnaldyq sharýashylyǵyn keń kólemde jańǵyrtýdyń 2020 jylǵa deıingi josparyn jasaýdy tapsyrdy. Ol ózindik paıdalaný shyǵyndaryn tómendetýmen jáne resýrs saqtaýshy tehnologııalar engizýmen qosa júrýge tıis. Qazirgi tańda ázirlenip jatqan bul qujattyń naqty tetikteri týraly aıtý erterek. Degenmen ol maýsymnyń 1-ine deıin qaraýǵa usynylady», dedi QR Qurylys jáne turǵyn úı -kommýnaldyq sharýashylyq isteri agenttiginiń jaýapty hatshysy Salaýat Dembaı. Onyń aıtýynsha, jospardy jasaý kezinde 4 negizgi baǵyt aıqyndalyp otyr. Birinshisi - qoldanystaǵy jeliler men kommýnaldyq sektordaǵy nysandardy jańartý men qaıta qurylymdaý. Ekinshisi - eldi-mekenderdi ómirge qajetti qurylǵylarmen qamtamasyz etý. Úshinshisi - kóp páterli turǵyn úılerdi kútip ustaý jáne jóndeýmen qamtamasyz etý. Tórtinshisi - turǵyn úı-kommýnaldyq sharýashylyǵynyń tıimdiligin arttyrý úshin ınstıtýtsınaldyq negiz qurý.
