Turǵyn úı-kommmýnaldyq sharýashylyq boıynsha biryńǵaı aqparattyq júıe qurylady

ASTANA. QazAqparat - TÚKSh salasyndaǵy biryńǵaı aqparattyq júıe, qyzmettiń aıqyndylyǵyn qamtamasyz etedi,odan bólek turǵyndar shyǵyndar men tabystardyń esebin kóre alady. Bul týraly OKQ-de ótken baspasóz máslıhatynda QR Indýstrııa jáne ınfraqurylymdyq damý mınıstrligi Qurylys salasyn jáne turǵyn úı-kommýnaldyq sharýashylyǵyn damytý departamenti dırektorynyń orynbasary Marǵulan Ábdikárimov málim etti, dep habarlaıdy QazAqparat tilshisi.

«Jańa zań jobasy aıasynda úı-jaı menshik ıeleri tarapynan baqylaýdy qamtamasyz etý jáne menshik ıeleri, basqarýshy kompanııalar, servıstik uıymdar jáne ákimdikter arasyndaǵy ózara is-qımyldy jaqsartý úshin turǵyn úı-kommýnaldyq sharýashylyǵynyń aqparattyq júıesin qurý kózdelip otyr. Júıe kóppáterli turǵyn úıdi basqarý organdary qyzmetiniń aıqyndylyǵyn qamtamasyz etedi, turǵyndar shyǵyndar men tabystardyń esebin kóre alady, úıdi basqarý men kútip ustaý boıynsha elektrondyq daýys berý arqyly sheshim qabyldaı alady»,-dedi mınıstrlik ókili.

Onyń aıtýynsha, turǵyndardyń úıge qyzmet kórsetý boıynsha elektrondyq ótinim (aryz, habarlama jáne t.b.) berýge jáne onyń oryndalýyn qadaǵalaýǵa múmkindigi bolady.

«Júıeniń mańyzdy mindetiniń biri - jınalǵan jarnalardy durys jumsaý jáne kóppáterli turǵyn úıdi kúrdeli jóndeýden ótkizý úshin jınaqtardyń ashyqtyǵyn qamtamasyz etý. Shottaǵy aqshanyń qozǵalysy zań talaptaryna sáıkes banktik jáne zańmen qorǵalatyn júıede kórinis tabady. Kondomınıýmniń basqarý organdaryn turǵyn úı qory jáne turǵyn úı-kommýnaldyq sharýashylyǵynyń biryńǵaı aqparattyq júıesinde úıdi kútip ustaý boıynsha shart jasasýyn zańnamalyq túrde mindetteýdi usynýdamyz» - dedi ol.

Ol boıynsha turǵyn úı qory jáne turǵyn úı-kommýnaldyq sharýashylyǵynyń biryńǵaı aqparattyq júıesinde mindetti túrde úıdiń tehnıkalyq pasporty, menshik ıeleri týraly derekter men esepteýishterdiń kórsetkishteri engizilýi qajet.

«Aǵymdaǵy qajettilikterge jınaq shotynan qarajat jumsaý kerek bolǵanda biryńǵaı aqparattyq júıe turǵyndarǵa eskertedi jáne rastaýyn talap etedi. Sonda óz úıin basqarýǵa múlde qatyspaıtyn menshik ıeleri azaıa túsedi. Turǵyn úı qory jáne turǵyn úı-kommýnaldyq sharýashylyǵynyń biryńǵaı aqparattyq júıesi turǵyndarǵa úıin 24/7 onlaın tártibinde basqarýǵa múmkindik beredi», - dedi M. Ábdikárimov.

Eske sala keteıik, buǵan deıin turǵyn úı-kommýnaldyq sharýashylyǵy salasy ózgeriske ushyraıtynyn jazǵan bolatynbyz.