Turǵyn úı komıssııasy múgedektigi bar jetim qyzdy baspanasyz qaldyra jazdady - prokýratýra
Balalar úıinde tárbıelengen jáne ІІ toptaǵy múgedektigi bar qyz bala (densaýlyǵyna baılanysty óz áreketteri úshin jaýap bere almaıdy) 2013 jyly úı satýshysyna senim artyp, depozıtte jınaǵan 1 mln teńgesine jataqhanadan 1 bólmeli páter satyp alady. Alaıda, ol jer turýǵa múldem jaramsyz (sýyq, kógergen, jóndeýsiz jáne esiksiz) bolady. Sondyqtan, ol tanystarymen birge basqa jerde turady jáne sol kisilerdiń kómegimen 2019 jyly páterin satyp jiberedi. Sol jyly oǵan jetim retinde kezektilik tártibimen memleketten 1 bólmeli páter («Báıterek» shaǵyn aýdanynan) beriledi. Alaıda, onyń menshiginde jataqhanadaǵy 1 bólmeli páter bolýy negizinde turǵyn úı komıssııasy atqarýshylyq is qozǵaı otyryp, oǵan páter berý týraly sheshimdi joıady.
Múgedektigi baryna baılanysty qyz balanyń quzyretti organdarǵa óz betinshe júginýge múmkindigi, sondaı-aq jaqyn týystary men qamqorshylary da joq. Onyń aýyr jaǵdaıy týraly prokýratýra organdaryna atqarý týraly óndiristerdi taldaý barysynda belgili boldy. Shuǵyl túrde atqarýshylyq is júrgizýdi toqtata tura, prokýratýra qyzmetkerleri qadaǵalaý aktilerin engizip, jetim qyzdyń turǵyn úı alýǵa konstıtýtsııalyq quqyqtaryn qalpyna keltirý jóninde der kezinde sharalar qabyldady.
Birinshi kezekte, Taraz qalalyq sotynyń 2022 jylǵy 28 qańtardaǵy sheshimimen qyz bala aýrýyna baılanysty áreketke qabiletsiz dep tanyldy jáne Taraz qalasy ákimdiginiń 2022 jylǵy 28 naýryzdaǵy qaýlysymen oǵan qamqorshy taǵaıyndaldy. Jataqhanadaǵy bólmeni satyp alý-satý mámilelerin jasaý kezeńinde óz is-áreketteriniń mańyzdylyǵyn jáne olardyń saldaryn túsine almaǵandyǵy eskerile otyryp, sotqa olardy jaramsyz dep taný týraly talap aryz berildi.
Taraz qalalyq sotynyń 2022 jylǵy 11 qarashadaǵy sheshimimen talap tolyq kólemde qanaǵattandyryldy, bul bıyl 1 aqpanda turǵyn úı komıssııasynyń máseleni qaıta qarap, oń sheshim qabyldaýyna negiz boldy. Demek, Jambyl oblysy prokýratýrasynyń yqpalymen ІІ toptaǵy múgedektigi bar turǵyn memleketten berilgen páterinde qaldy.