Turǵyn úı kezegine turý úshin «jas otbasy» sanatyn 29 jastan 35 jasqa deıin kóterý kózdelýde - Q.Óskenbaev
ASTANA. QazAqparat - Qazaqstanda jańa turǵyn úı baǵdarlamasy aıasynda jas otbasylar úshin jaldamaly baspana alý talaptary ózgertiledi. Bul týraly búgin QR Parlamenti Senatynda Ulttyq ekonomıka vıtse-mınıstri Qaıyrbek Óskenbaev aıtty.
«Salynǵan turǵyn úıdiń shamamen 50 paıyzy jas otbasylarǵa beriledi dep josparlanǵan. Jas otbasylarǵa qoıylatyn jańa talaptar da bizde qarastyrylyp jatyr. Eger búginde «Turǵynúıjınaqbanki» baǵdarlamasy arqyly 29 jas belgilengen bolsa, qazir biz bul mejeni kóterý kerek dep esepteımiz. Óıtkeni, qansha degenmen qazir jastar kesh úılenedi. Osyǵan baılanysty, biz bul kórsetkishti 35 jasqa deıin kótergimiz keledi», - dedi Q. Óskenbaev Senatta «QR-nyń turǵyn úı qatynastary týraly keıbir zańnamalyq aktilerge ózgertýler men tolyqtyrýlar engizý týraly» zań jobasyn talqylaý barysynda.
Onyń aıtýynsha, baǵdarlama jospar boıynsha jyl sońyna deıin qabyldanady. Turǵyn úı qurylysy 2015 jyly bastalady. «Jeltoqsannyń sońyna deıin memlekettik baǵdarlama qabyldanyp, parametrleri ózgeredi dep kútilýde» - dedi ol.
