«Turǵyn úı qatynastary týraly» QR Zańy áli kúnge deıin óz deńgeıinde jumys istemeı tur - A.Ótegenov
ASTANA. Qyrkúıektiń 15-i. QazAqparat /Gúlmıra Álıakparova/ - «Turǵyn úı qatynastary týraly» QR Zańy áli kúnge deıin óz deńgeıinde jumys istemeı tur.
Bul týraly búgin «Nur Otan» halyqtyq demokratııalyq partııasynyń Ortalyq apparatynda 2020 jylǵa deıingi turǵyn úı-kommýnaldyq sharýashylyǵyn aýqymdy jetildirýdiń salalyq baǵdarlamasynyń jobasyn talqylaýǵa arnalǵan dóńgelek ústelde QR Parlamenti Májilisiniń depýtaty Amanǵos Ótegenov málim etti.
A.Ótegenovtyń aıtýynsha, byltyr «Turǵyn úı qatynastary týraly» QR Zańyna ózgerister men tolyqtyrýlar engizildi. Biraq búgingi kúnge deıin onda kórsetilgen birqatar máseleler óz deńgeıinde oryndalmaı otyr. Ol máseleler 2020 jylǵa deıingi turǵyn úı-kommýnaldyq sharýashylyǵyn aýqymdy jetildirýdiń salalyq baǵdarlamasynda egjeı-tegjeıli kórsetilgenimen, mınıstrlikter tarapynan birqatar túıitkilder sheshilmese, olar da sheshýsiz qalady.
Onyń pikirinshe, eń aldymen, Zańmen qurý kózdelgen turǵyn úı ınspektsııasyn qarjylandyrý máselesin sheshý qajet. Zań boıynsha turǵyn úı ınspektsııasy turǵyn úı qoryna revızııa jasaý, kondomınımým nysandaryn jóndeýdiń smetalaryn tekserýmen aınalysýy tıis. Al qarjylandyrý máselesi sheshilmegendikten olar áli kúnge deıin qurylmaı otyr.
Májilismen osy jáne birqatar basqa da jaǵdaılar boıynsha Úkimetke, ákimder men Qurylys jáne turǵyn úı-kommýnaldyq sharýashylyq isteri jónindegi agenttikke tıisti tapsyrmalar berilý qajettigin qadap aıtty.
