Turǵyn úı: «Baqytty otbasy» baǵdarlamasynyń sharttary qandaı
«Búgin bizdiń aldymyzda turǵan basty mindet - kópbalaly jáne tolyq emes otbasylardyń baspanaly bolýyna barynsha kómek kórsetý. Ol úshin nesıe berýdiń jeńildetilgen sharttary jasaldy. Elbasy Nursultan Nazarbaevtyń «Nur Otan» partııasynyń HVІІІ sezinde bergen tapsyrmasy boıynsha «Nurly jer» baǵdarlamasy aıasynda «Baqytty otbasy» atty jańa bir baǵyt maýsym aıynan bastap iske qosylady. Bul baǵdarlamaǵa tórt jáne odan da kóp balasy bar otbasylar, múmkindigi shekteýli balasy bar otbasylar qatysa alady. Kámelettik jasqa tolmaǵan balasy bar tolyq emes otbasylardyń da qatysýǵa quqyǵy bar», - deıdi Lázzat Ibragımova Úkimettiń baspasóz ortalyǵyndaǵy ótken brıfıngte.
Onyń aıtýynsha, nesıe boıynsha jańadan salynǵan nemese ekinshi naryqtaǵy daıyn úılerdi satyp alýǵa múmkindik týyp otyr.
««Baqytty otbasy» baǵdarlamasynda bir adamǵa shaqqandaǵy tabysy 42 500 teńgeden aspaıtyn otbasylar qatysa alady. Máselen, eger otbasy alty adamnan tursa, onda onyń jalpy tabysy 255 myń teńgeden aspaýy kerek. Sondaı-aq, jeńildetilgen nesıe boıynsha jeke basyna jáne onymen birge turatyn otbasy múshelerine ótinim bergen kúndi alǵanda baspanasy joq bolýy kerek. Qazir biz naýryz aıynan bastap pılot túrinde «Baqytty otbasy» baǵdarlamasyn Almaty oblysynda bastadyq. Ol boıynsha, ákimdikte kezekte turǵan kópbalaly otbasylar jańadan salynǵan úılerden páter satyp alý úshin jyldyq 2 paıyzben, 10 paıyzdyq bastapqy jarnamen nesıe ala alady», - deıdi ol.
Basqarma tóraıymy qazirgi tańdaǵy nátıje týraly da sóz qozǵady.
«344 otbasy bizge ótinim berdi. Onyń arasynda 330 otbasynyń ótinimi maquldandy. Búgin eki otbasy nesıe shartyna qol qoıady. Qazir bizdiń bankke 44 otbasyǵa 1 mln teńgeden ákimdik turǵyn úı sertıfıkatynyń aqshasyn esepshotyna saldy. Búgin tamasha kún: kópbalaly eki otbasy alǵashqy bolyp 2 paıyzben páter alyp, baspanaly boldy», - deıdi Lázzat Ibragımova.
