Turǵyn úı baǵdarlamasynyń tabysty bolýy páterge muqtaj jandardyń baspanaly bolýymen aıqyndalady - D.Nazarbaeva

ASTANA. QazAqparat - Turǵyn úı qurylysy memlekettik baǵdarlamasynyń tabysty bolýy páterge muqtaj jandardyń baspanaly bolýymen aıqyndalady. Búgin «Báıterek» UBH janyndaǵy qoǵamdyq keńestiń otyrysynda QR Parlamenti Májilisi Tóraǵasynyń orynbasary Darıǵa Nazarbaeva osylaı málim etti.

«Astana men Almatyda jáne taǵy da birqatar qalalarda bastalatyn baǵdarlamanyń tabystylyǵy sharshy metrlermen nemese ıgerilgen qarjy kólemimen emes, shyn máninde páterge muqtaj jandardyń baspanaly bolýymen aıqyndalady», - dedi ol.

Onyń atap ótýinshe, áleýmettik jalǵa beriletin turǵyn úılerdi salý paıyzy qymbat nesıelik zaımdarǵa shynaıy balama bolýy tıis.

«Báıterek» holdıngi atalǵan baǵdarlama boıynsha páterlerdi salýda jáne satýda, sonymen qatar úmitkerlerdi irikteýge qatysty máselelerdiń zańdy ári ádil bolýyna aıryqsha nazar aýdarýy tıis», - dedi D.Nazarbaeva.

Aıta keterligi, aldaǵy bes jylda elimizde 1,5 mln. sharshy metr turǵyn úı, ıaǵnı 29 myń áleýmettik jalǵa beriletin páter salý josparlanǵan. Aǵymdaǵy jyldyń ózinde ǵana 487 myń sharshy metr jalǵa beriletin turǵyn úı salý kózdelgen.