Turǵyn úı baǵdarlamasy boıynsha páterlerdi alýǵa jalǵan kómek jasaý paıdakúnemderdiń zańsyz baıýynyń kózine aınalyp otyr

Bul týraly búgin Astanadaǵy brıfıngte QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) resmı ókili Murat Jumanbaı málim etti.

Onyń aıtýynsha, Batys Qazaqstan oblysynda árqaısysy 5 jylǵa shartty túrde bas bostandyǵynan aıyrýǵa Nurǵalıeva men Bıssalıeva sottaldy. Olar memlekettik turǵyn úı baǵdarlamasy boıynsha páter alýǵa kómektesemin degen syltaýmen 4 azamattyń 30 myń AQSh dollary kólemindegi aqshalaı qarajatyn urlaǵan.

Resmı ókil alaıaqtardyń zańsyz baıýynyń taǵy bir ádisi bolyp jer telimderin alýǵa jalǵan kómek jasaý tabylatynyn atap kórsetti, Máselen, Almaty oblysynda Qypshaqov 6 jylǵa bas bostandyǵynan aıyrýǵa sottaldy. Ol 4 azamatqa Talǵar jáne Іle aýdandarynda jer telimderin beremin degen jeleýmen olardan 95 myń AQSh dollaryn alǵan.

Astanada Rahmanov pen Ahmetov árqaısysy 3 jyldan shartty túrde bas bostandyǵynan aıyrýǵa sottaldy. Olar Golf-klýb aýmaǵynda jer telimin alyp beremiz degen syltaýmen B. degen azamattyń 10 myń AQSh dollaryn jymqyrǵan.