Turǵymbaev polıtseılerdiń vıdeotirkeýishpen jumys protsesi týraly aıtty
ASTANA. QazAqparat - QR Іshki ister vıtse-mınıstri Erlan Turǵymbaev jol-sholǵynshy polıtseıdiń de, júrgizýshiniń de barlyq áreketin taspaǵa túsiretin vıdeotirkeýish jazbalarynyń qalaı saqtalatyndyǵyn aıtyp berdi, dep habarlaıdy QazAqparat.
Onyń aıtýynsha, polıtsııa qyzmetkerleri vıdeotirkeýishterdi kezekshilik bólimnen alyp, keshke ony qaıtadan tapsyryp otyrady.
«Olardaǵy málimetterdi júkteýdi polıtseılerdiń ózderi emes materıaldyq-tehnıkalyq qamtamamyz etýge jaýapty tulǵalar júzege asyrady. Túsirilgen barlyq jazba muraǵattalady. Eger júrgizýshi polıtsııaǵa shaǵymdanatyn bolsa, onda biz ony kez kelgen ýaqytta alyp, kórýge múmkindigimiz bar», - dedi ol Úkimet úıinde «100 naqty qadam» Ult josparynyń iske asyrylý barysyna arnalǵan baspasóz máslıhatynda.
Sonymen qatar ol aǵymdaǵy jyly «Jol qozǵalysy týraly» Zańǵa ózgertýler men tolyqtyrýlar engizilgendigin eske saldy. Atalǵan zańda janjal týyndaǵanda nemese polıtseıdiń is-áreketimen kelispegen jaǵdaıda júrgizýshige vıdeotúsirilim jasaýǵa quqyq berilgen. sonyń arqasynda vıdeotirkeýshisi bar polıtseıdiń is-áreketine shaǵymdanatyn jáne aryzdanatyn azamattardyń sany tyıyldy desek te bolady.
«Jyldyń sońyna deıin jol-sholǵynshy polıtseılerdi 100 paıyz vıdeotirkeýishpen qamtamasyz etemiz. Óıtkeni, olar negizinen azamattarmen kezdesip, ákimshilik jaza qoldanady. Jol qaýipsizdigi baǵytynda osy jyldyń ishinde shamamen mıllıonǵa jýyq hattama jasaldy. Árıne, daýly máseleler de týyndaıdy. Árbir júrgizýshi polıtsııa áreketiniń zańdylyǵyna daýlasýǵa tyrysady. Sondyqtan da vıdeotirkeýish polıtseıdiń de, júrgizýshiniń de is-áreketin esh kedergisiz tirkeıtin qural bolyp otyr», - dedi Turǵymbaev.
