Turǵymbaev qaza tapqan aqmolalyq eki polıtseıdiń otbasylaryn merekemen quttyqtady
KÓKShETAÝ. QazAqparat – QR Іshki ister mınıstri Erlan Turǵymbaev qol qoıǵan quttyqtaý hatyn Býrabaı aýdanyndaǵy qaza tapqan eki polıtseıdiń otbasy aldy, dep habarlaıdy QazAqparat tilshisi Aqmola oblysy Polıtsııa departamentiniń baspasóz qyzmetine silteme jasap.
QR Іshki ister mınıstri, polıtsııa general-leıtenanty Erlan Turǵymbaev Býrabaı aýdanynda qyzmettik mindetterin atqarý kezinde qaza tapqan eki polıtsııa qyzmetkeriniń otbasyn Jańa 2021 jylmen quttyqtady.
Mınıstrdiń qoly qoıylǵan quttyqtaý ashyq hatyn, merekelik konvert jáne syılyqty Aqmola oblystyq Polıtsııa departamentiniń bastyǵy Armanbek Baımýrzın tapsyrdy.
Vedomstvo basshysy qaza bolǵan ofıtserlerdi eske ala otyryp, olardyń árqaısysynyń kásibı qasıetterin atap ótti. Jańa jyl merekesimen quttyqtap, syılyqtar tabys etti.
«Ýchaskelik polıtsııa ınspektory Qanat Hamıdýllınniń otbasynda 2020 jyldyń 14 jeltoqsanynda ol kútken mańyzdy oqıǵa boldy - ekinshi uly dúnıege keldi. Jańa týǵan náresteniń esimi ákesi armandaǵandaı Shyńǵys qoıyldy. Qazirgi ýaqytta úıdiń úlkeni jeti jasar Nursultan anasyna kómektesip, jańa týǵan inisine qamqorlyq tanytýda.
Al artynda Adel, Álıhan jáne Batyrjan esimdi úsh balasy qalǵan Qanat Otarbaevtyń otbasy úshin vedomstvolyq úsh bólmeli páter bólindi», - dedi vedomstvodan.
Atap ótilgendeı, Іshki ister mınıstri, oblystyq departament pen aýdandyq bólimshelerdiń basshylyǵy qaza tapqan áriptesteriniń otbasylaryna únemi moraldyq jáne materıaldyq qoldaý kórsetip keledi.
Eske salaıyq, 2020 jyldyń 15 qazanynda Aqmola oblysynyń Şýchınsk qalasynda polıtsııanyń eki qyzmetkeri jol apatynan qaza tapqan bolatyn.
