Turǵyndarǵa arnalǵan tegin servıs iske qosylmaq
ASTANA. KAZINFORM – Ónerkásip jáne qurylys vıtse-mınıstri Rahymjan Isaqulov Quryltaı depýtattarynyń turǵyndarǵa tegin qoljetimdi, onlaın daýys berýdiń negizgi modýli bar turǵyn úılerdi basqarýǵa arnalǵan tsıfrlyq servısti iske qosý usynysyna jaýap berdi.
Onyń aıtýynsha, atalǵan másele tsıfrlandyrý salasyndaǵy ýákiletti organmen jáne memlekettik qyzmetterdi tikeleı kórsetetin «Azamattarǵa arnalǵan úkimet» memlekettik korporatsııasy» KEAQ-pen birlesip pysyqtaldy.
«Azamattarǵa arnalǵan úkimet» korporatsııasy usynǵan aqparatqa sáıkes, qazirgi ýaqytta kondomınıým obektilerin basqarý organdarynyń, atap aıtqanda múlik ıeleri birlestikteriniń (MIB) qyzmetin retteýge arnaıy beıimdelgen balama tsıfrlyq servıs qurý máselesi qarastyrylyp jatyr.
- Atalǵan servısti ázirleýdegi negizgi maqsat – azamattardyń derbes derekterin barynsha senimdi qorǵaýdy qamtamasyz etý. Derbes derekterdi tikeleı berýdi talap etetin qoldanystaǵy júıelerden aıyrmashylyǵy - memlekettik korporatsııa derekterdi heshteý tehnologııasy arqyly menshik quqyǵyn (jyljymaıtyn múliktiń bar-joǵyn) rastaý tetigin usyný. Bul menshik ıesin onyń jeke málimetteriniń taralyp ketý qaýpine ushyratpaı sáıkestendirýge múmkindik beredi, - dedi ol.
Vıtse-mınıstr qazirgi ýaqytta atalǵan arhıtektýralyq tásildiń kıberqaýipsizdik talaptaryna sáıkestigin rastaý úshin Tsıfrlyq damý, ınnovatsııalar jáne aeroǵarysh ónerkásibi mınıstrliginiń Aqparattyq qaýipsizdik komıtetimen kelisý satysynda turǵanyn aıtady.
- Memlekettik korporatsııa kelisý kezeńi aıaqtalyp, birlesken tehnıkalyq sheshim qabyldanǵannan keıin servısti 2027 jyly iske qosýǵa daıyn ekenin bildirdi, - dedi Rahymjan Isaqulov.
Buǵan deıin Múlik ıeleri birlestigi tóraǵalarynyń quzyretine qatysty birqatar dál emes ári ekiushty uǵymdar anyqtalǵanyn, burynǵy MIB tóraǵasynyń ETsQ-syna táýeldilikten qalaı arylýǵa bolatynyn jazǵan edik.
Sonymen qatar 78 páter ıeleri kooperatıvi men páter ıeleriniń tutyný kooperatıvteri qaıta tirkeýden óte almaǵany belgili bolǵan edi.
