Turǵyndardyń kásip bastaýyna járdemdespegen 382 ózbekstandyq sheneýlik qyzmetinen bosatyldy

TAShKENT. KAZINFORM – Ózbekstan prezıdenti Shavkat Mırzıeev memlekettik organ basshylarymen ótkizgen keńes barysynda turǵyndardy kásipkerlikke baýlý máselesin júıeli sheshpegen jergilikti atqarýshy bılik ókilderin synǵa aldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan basshysynyń baspasóz qyzmetinen habarlaǵandaı, sáýir aıynda bastalǵan turǵyndardy qoldaý jobasynyń nátıjesinde 365 myń adam jumyspen qamtylyp, kásipkerlikke tartylǵan. 

Bankter nesıe alyp, óz isin bastaýǵa nıetti azamattarmen tyǵyz jumys isteı bastady, sáıkesinshe 115 myń adam eńbekke aralasty. Mahallıalarda 70 myń mıkrojoba júzege asyp, 465 myń gektar jerge kókónis pen jemis-jıdek egildi.

«Alaıda, keıbir aımaqtarda jumys baıaý júrip jatyr. Máselen, 7 aýdandaǵy ahýaldy zertteý barysynda ondaǵan úı ýchaskesinde birde-bir daqyl egilmegeni anyqtaldy. Sondyqtan osyndaı kemshilikke jol bergen aýdandyq deńgeıdegi 382 jaýapty tulǵa qyzmetinen bosatyldy», - dep málim etti Ózbekstan prezıdentiniń baspasóz qyzmetinen.

Qosa ketsek, jyl basynan beri 115 myń ózbekstandyq eńbek mıgranty Otanyna oraldy. Tıisinshe, Shavkat Mırzıeev olardy jumyspen qamtýǵa jaǵdaı jasaýdy tapsyrdy.