Turǵyndardy tońdyrǵan 4 táýlik: Saranda barlyq úıge jylý berildi
ASTANA. KAZINFORM - Sarandaǵy barlyq úıler men áleýmettik nysandarǵa jylý berildi. Jylý berý ortalyqtary qajetti otynmen qamtamasyz etilgen. Qalanyń barlyq óndiristik nysandary shtattyq jaǵdaıda jumys istep tur, dep habarlaıdy QR Energetıka mınıstrliginiń baspasóz qyzmeti.
Energetıka mınıstri Almasadam Sátqalıev qazandyqtardyń, ortalyq jylý kóziniń, sondaı-aq jylý jelileri men áleýmettik nysandardyń jaǵdaıyn tekserip, jedel shtab otyrystaryn ótkizdi.
- Qazir rezervte turǵan barlyq jergilikti qazandyqtar daıyndalyp, iske qosyldy. Jylý tolyq kólemde berilýde. Biz barlyq qazandyqtarda jylý berý temperatýrasyn baqylap otyrmyz. Qosymsha qazandyqtarmen keńeıtý qajet bolǵan jerler de jaqyn arada keńeıtiletin bolady. Turǵyndar buryn bolǵan eki qazandyq boıynsha suraq qoıdy, bul úıler basqa jumys istep turǵan qazandyqtarǵa qaıta qosyldy, – dedi Qaraǵandy oblysynyń ákimi Ermaǵanbet Bólekpaev.
Arnaıy komıssııa qurylyp, onyń quramynda energııa qadaǵalaý ókilderi, óńirlik jáne basqa da vedomstvolardyń basshylary, TJD birlesip jumys isteýde. Ortalyq jylý kózin jóndeý kezinde jabdyqtardy jetkizýshi zaýyttyń mamandary shaqyryldy.
– Biz barlyq jylý kózderin aralap, jylýmen qamtý shemasyn qalpyna keltirý jumystarynyń barysyna jetkilikti túrde egjeı-tegjeıli taldaý jasadyq. Kelesi sheshim qabyldandy: ortalyq jylý kózi iske qosylǵanǵa deıin qalany jylýmen qamtýdy jergilikti qazandyqtar qamtamasyz etedi. Barlyq áleýmettik nysandar jylýmen qamtamasyz etilgen, barlyq óndiristik nysandar óndiristik baǵdarlamalarǵa sáıkes jumys isteýde», — dedi Almasadam Sátqalıev.
Úılerge jylý berý aıaqtalýda. Jaǵdaı energetıka mınıstrligi men oblys ákimdiginiń baqylaýynda.
Aıta keteıik, 13 qazan kúni Saran qalasynyń turǵyndary áleýmettik jelilerde úılerinde jylýdyń bolmaýyna baılanysty jappaı narazylyǵyn bildire bastady. Osydan soń qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
Premer-mınıstr Oljas Bektenov Úkimet otyrysynda Saran qalasyndaǵy jylý júıesiniń aqaýyna jol bergen adamdar jaýapqa tartylatynyn aıtty.
Osydan soń Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Energetıka mınıstri Almasadam Sátqalıev jergilikti qazandyqtardyń, ortalyq qazandyqtyń, sondaı-aq Saran qalasynyń jylý jelileri men áleýmettik nysandarynyń jaǵdaıyn tekserip, qazandyqtyń iske qosylmaýynyń sebepterin atady.
