Turǵyndardan shaǵym kóp – Oljas Bektenov Mańǵystaý oblysynyń ákimine tapsyrma berdi
ASTANA. KAZINFORM – Úkimet otyrysynda Premer-mınıstr Oljas Bektenov Mańǵystaý oblysynda qubyry tartylǵanmen beriletin sýdy tuşylandyratyn zaýyt qurylysy keshigip jatqanyn synǵa aldy.
«Mańǵystaý oblysynyń turǵyndarynan turaqty negizde shaǵymdar túsedi. Óńirde jeliler salyndy, alaıda sý tuşytý zaýyttary men qondyrǵylardy salý jobalaryn iske asyrý keshigýde. Oblys ákimine qurylys jumystaryn belsendi júrgizýdi tapsyramyn. Densaýlyq saqtaý mınıstrligi sýdyń sapasy men tazalyǵyna baqylaýdy kúsheıtýi qajet», - dedi ol.
Oljas Bektenov Atyraý qalasynda sorǵy-súzgi stantsııasyn jańǵyrtý jobasyn ázirleý uzaqqa sozylyp ketkenine nazar aýdardy.
«Ol nysannyń tozý kórsetkishi shamamen 90%-ǵa jetken. Ákimdikke birinshi shildege deıin jobany ázirleýdi aıaqtaýdy jáne ony dereý iske asyrýǵa kirisýdi tapsyramyn», - dedi Premer-mınıstr.
Eske salsaq, 17 mamyr kúni Mańǵystaý oblysynyń ákimi aýysqan edi. 21 mamyr kúni Prezıdent aımaqtyń jańa basshysyn qabyldap, mańyzdy mindetter júktedi.
