Turǵyndar ómirine qaýip tónse, aldyn ala habarlaımyz – Serik Shápkenov
ATYRAÝ – KAZINFORM – Sý tasqynynan turǵyndar ómirine qaýip tóner bolsa, aldyn ala habarlanady. Bul týraly Atyraý oblysynyń ákimi Serik Shápkenov málim etti.
Oblys ákiminiń aıtýynsha, 1994 jylǵy sý tasqynynan keıingi 30 jylda ózenderdegi sý azaıyp, túp tereńdetý jumystary uzaq ýaqyt boıy júrgizilmegen.
«Bógetter nyǵaıtylmaǵan, jaǵalaýdyń keıbir tusynda múldem alynyp tastalǵan. Sýdan qorǵaý aımaǵynan aýyl sharýashylyǵynyń qajettiligi úshin jer telimderi berilgen. Ózen arnalary tazartylmady. Bul jumystardyń barlyǵyn óńirge tasqyn sý kelgenge deıin atqarýymyz kerek edi», - dedi Serik Shápkenov.
Onyń pikirinshe, tabıǵı sıpattaǵy tótenshe jaǵdaı rejımin jarııalaýdyń birneshe maqsaty bar. Birinshiden, sý tasqynyna tıimdi daıyndyqty uıymdastyrý. Ekinshiden, tehnıkalar men jabdyqtar tartý, úshinshiden ǵylymı zertteýler júrgizý, óńirdegi ózen jaǵalaýlaryn nyǵaıtý maqsatynda jarııalanǵan.
«Eger sý tasqynynan oblys turǵyndarynyń ómirine naqty qaýip tóner bolsa, biz bul týraly aldyn ala habarlaımyz», - dep atap ótti Serik Shápkenov.
Eske sala ketelik budan buryn Atyraý oblysynda tótenshe jaǵdaı jarııalanǵanyn habarlaǵan edik.
