Turǵyndar narazylyǵynan keıin Oral qalasynyń ortasyna qar shyǵarý toqtatyldy
ORAL. KAZINFORM — Oral qalasynda «Volna» baý-baqsha seriktestiginiń turǵyndary ózderine taıaý ornalasqan qar úıiletin polıgondy jabýdy talap etti.
Turǵyndardyń sózine qaraǵanda, polıgondy jabýmen qatar onda jınaqtalǵan qardy da shyǵarý qajet. Óıtkeni kóktemde erigen qar sýy saıajaılardy basyp qalýy yqtımal.
Sonymen qatar qudyqtar men uńǵymalarǵa zııandy zattar túsýi múmkin. Oǵan qosa turǵyndardyń ózderi jóndep turatyn joldy qar tasıtyn aýyr tehnıkalar búldirýde.
Osy máselege baılanysty Oral qalasy ákimdiginde arnaıy jınalys ótkizildi.
Onda qala ákiminiń orynbasary Jandos Dúısenǵalıev atalmysh polıgonǵa qar shyǵarý ýaqytsha toqtatylǵanyn málimdedi.
Onyń sózine qaraǵanda, qazirgi kezde ýákiletti organ qardy ýaqytsha shyǵaratyn oryndy tańdaýǵa qatysty zertteý jumystaryn júrgizýde.
Budan buryn 2024 jylǵy jeltoqsanǵa deıin qar teleortalyq mańyndaǵy polıgonǵa shyǵarylyp kelgen bolatyn. Turǵyndar men ekologtar dabyl kótergennen keıin ol polıgon jabylyp, Oral qalasy ákimdigi ózen jaıylmasynda ornalaspaǵandyqtan, qardy «Omega» zaýyty aýdanyndaǵy aýmaqqa ýaqytsha shyǵarý jóninde sheshim qabyldaǵan edi. Endi, mine, bul da daýǵa aınalyp otyr.
— Hattamalyq tapsyrma negizinde Oral qalasy turǵyn úı-kommýnaldyq sharýashylyǵy, jolaýshy kóligi jáne avtomobıl joldary bólimi atalǵan ýchaskeni óz teńgerimine alý kerek edi. Alaıda «Geoportal» aqparat júıesi eki aı boıy jumys istemegendikten, jerdiń memlekettik aktisin alýǵa múmkindik bolmady. Topografııalyq túsirý jáne basqa tıisti rásimder jasaldy. Budan bólek, «Volna» baý-baqsha seriktestiginiń saıajaı ýchaskelerin sý baspas úshin bóget turǵyzyldy. Sonymen qatar saıajaıǵa aparatyn kireberis joldar sý tasqyny kezeńinen keıin retke keltiriletin bolady, — dep habarlady Oral qalasy ákimdiginen.
BQO ekologııa jónindegi komıssııa múshesi Tatıana Starıchenkova osy máselege qatysty óz pikirin bildirdi.
— «Omega» zaýyty aýdanyndaǵy polıgon ýaqytsha jabyldy. Mundaǵy jaǵdaı talqylaýlardan keıin belgili bolady. Keshe bizdiń kózimizshe tasylǵan qardan synama alyndy. Sondaı-aq turǵyndar zııandy zattar bar-joqtyǵyn anyqtaý úshin qudyqtaǵy sýdan synama aldy. Eń bastysy, derekter burmalanbas úshin táýelsiz saraptama jasalatyn bolady. Polıgonda qar qarqyndy erigen kezde sýdan qaıtadan synama alynady, — dedi T.Starıchenkova.
Oblys ortalyǵynda qar budan basqa Asan jáne «Balaýsa» shaǵynaýdanynda ornalasqan polıgondarǵa shyǵarylyp keledi.
Eske sala keteıik, budan buryn Oralda kósheden kúrelgen qardy nege qalanyń ishine tógip júrgenin jazǵan bolatynbyz.