Turǵyndar kómirdi turaqty baǵamen satyp alýy úshin eshqandaı qıyndyq bolmaýy kerek – Oljas Bektenov
ASTANA. KAZINFORM – Endi eń bastysy – jylý berý maýsymyn qalypty deńgeıde ótkizip, josparlanǵan barlyq parametrlerdi saqtaı bilý. Bul týraly Úkimet otyrysynda Premer-Mınıstr Oljas Bektenov aıtty.
«Búgingi kúni elimizdiń kóptegen óńirinde jylý berý maýsymy ýaqtyly bastaldy. Qalǵan óńirlerge, ásirese ońtústik oblystarǵa, jylý jaqyn kúnderi qosylady. Merzimderdiń buzylýyna jol berilgen joq. Qajetti qarajattyń barlyǵy bólindi. Birqatar óńirde jylý kózderiniń rezervtik jabdyqtaryn jóndeý jumystary jalǵasýda. Josparlanǵan jobalar iske asyrylyp, kómir men mazýt qorlary normatıvtik deńgeıge jetkizilýde. Úlken jumys atqaryldy. Ony bólingen qarjy kóleminen de, júrgizilgen jumys aýqymynan da baıqaýǵa bolady. Endi eń bastysy – jylý berý maýsymyn qalypty deńgeıde ótkizip, josparlanǵan barlyq parametrlerdi saqtaı bilý», - dedi Úkimet basshysy.
Premer-Mınıstrdiń atap ótýinshe, kommýnaldyq kásiporyndardyń jóndeý bólimshelerin qajetti qural-jabdyqtarmen qamtamasyz etý kerek. Olar kez kelgen jaǵdaıǵa shuǵyl áreket etý úshin daıyn bolýǵa tıis.
Ákimderge jylý berý maýsymynyń barysyn jeke baqylaýda ustaýy qajet.
«Sondaı-aq myna máselelerge nazar aýdaramyn. Birinshi, Energetıka mınıstrligi Ulttyq ekonomıka mınıstrligimen birlesip, «Tarıfti ınvestıtsııaǵa aıyrbastaý» baǵdarlamasy aıasynda jylý jáne elektr energetıkasy boıynsha ınvestıtsııalyq mindettemelerdiń oryndalýyna monıtorıng júrgizýge tıis. Ekinshi, Ulttyq ekonomıka, Energetıka mınıstrlikteri múddeli memlekettik organdarmen birlesip, barlyq jylý/energııa kásiporyndarynda tabıǵı monopolııa sýbektileriniń ınvestıtsııalyq mindettemeleriniń oryndalýyna baqylaý jasaý sharalaryn ózektendirýi qajet. Úshinshi, óńir ákimdikteri Ónerkásip jáne Kólik mınıstrlikterimen birlesip, kommýnaldyq jáne turmystyq kómirdi jetkizý boıynsha barlyq máseleni sheshýi tıis. Kómirdi vagondarmen tasymaldaýǵa basymdyq berý qajet. Turǵyndar kómirdi turaqty baǵamen satyp alýy úshin eshqandaı qıyndyqtar bolmaýy kerek», - dedi Oljas Bektenov.
