Turǵyndar dabyl qaqty: Ertis ózeniniń jyly aǵysy munaı ónimderimen lastanýy múmkin
PAVLODAR. KAZINFORM — Oblystyq ekologııa departamentiniń mamandary búgin ózen saǵasynan synama alyp, tekseretinin málim etti. Nátıjesi shamamen bes kún ishinde daıyn bolady.
Áleýmettik jelide Ertis ózeninen bólinip aǵatyn jyly aǵys saǵasynyń munaı ónimderimen lastanyp, sý betinde maı qabaty túzilgeni týraly vıdeo tarady.
— Myna jaǵdaıdy kórip, tóbe shashymyz tik turdy. Sýdyń betinde túgeldeı maıly qabat túzilgen. Sýdan benzın men munaı ónimderiniń ıisi shyǵyp tur. Bul jaı ǵana qoqys nemese laı sý emes. Bul naǵyz lastanýǵa uqsaıdy. Biz Ertiske jyl boıyna únemi kelip turamyz. Al búgin sýdyń las ekeni anyq baıqalyp tur. Ózenge ne bolyp jatyr? Ertis — bizdiń ólkemizdegi basty sý arnasy. Bul — sý, tabıǵat, ekojúıe jáne adamdardyń densaýlyǵy, — dep alańdaýshylyǵyn bildiredi beınejazbany túsirýshi adam.
Halyq aýzynda jyly aǵys dep atalatyn ózen saǵasy qys boıy qatpaı, býy burqyrap jatady. Sebebi bul ózenniń sýyn Aqsý qalasyndaǵy GRES óz óndirisin sýytý úshin paıdalanady. Ertisten jyrylyp aǵatyn ózen saǵasy elektr stansasyna salqyn kúıinde enip, odan aıtarlyqtaı qyzyp shyǵady. Osylaısha ol tómengi jaqqa jyly kúıinde aǵyp, Ertis ózenine qaıtadan qosylady.
— Jyly aǵys — Ertis ózeniniń mańyzdy saǵasy. Onyń sýy Aqsý GRES-inde lastaýshy tetiktermen nemese óndirispen janaspaıdy, tek jabdyqtardy sýytý úshin paıdalanylady. Kásiporyn ózen sýyn lastaýshy zat bólmeıdi. Bizdiń mamandar atalǵan beınejazbany kórdi. Arnaıy zerthana mamandary búgin jyly aǵysqa attanyp, odan synama alady. Sý quramyn zertteýdiń ózindik ádis-amaldary bar. Ol shamamen 5 táýlikke ulasýy múmkin. Ózen sýynyń neden lastanǵany sodan soń baryp belgili bolady, — dep habarlady Kazinform tilshisine oblystyq ekologııa departamenti basshysynyń orynbasary Áset Syzdyqov.
Ertis ózeniniń sýyn úsh birdeı memleket — Qytaı, Qazaqstan, Reseı elderi paıdalanatynyn aıtyp ótýimiz kerek. Ózenniń tómengi aǵysynda Pavlodar oblysynyń Pavlodar, Aqtoǵaı, Tereńkól, Ertis, Jelezın aýdandary ornalasqan. Bul aýmaqtardyń halqy ózen sýyn egin jáne mal sharýashylyǵy úshin keńinen paıdalanyp otyr.
Eske sala keteıik, Ertis basseıni aýmaǵynda zańsyz salynǵan 13 nysan joıylady.
