Turǵyn úılerdiń ishindegi kommertsııalyq nysandarǵa talaptar kúsheıtilmek
ASTANA. KAZINFORM – Turǵyn úılerdiń ishinde ornalasqan kommertsııalyq nysandarǵa qoıylatyn sanıtarııalyq jáne paıdalaný talaptary kúsheıtilýi múmkin. Bul týraly Quryltaı depýtattarynyń saýalyna Ónerkásip jáne qurylys vıtse-mınıstri Rahymjan Isaqulovtyń jaýabynda aıtylǵan.
Onyń atap ótýinshe, qoldanystaǵy zańnamada sanıtarııalyq normalarǵa qatysty birqatar talap belgilengen. Sondaı-aq kommertsııalyq nysandardy paıdalaný tártibine qoıylatyn talaptar aıqyndalǵan. Atal depýtattar usynǵan máselelerdi odan ári pysyqtaý qurylys jáne sanıtarııalyq normalardy eskere otyryp, barlyq múddeli memlekettik organnyń vedomstvoaralyq sheshimder qabyldaýyn talap etedi.
— Bul rette mınıstrlik tek qurylys normalary salasyndaǵy retteýshi organ sanalady. Osyǵan baılanysty atalǵan másele qosymsha pysyqtalatyn bolady, — dedi ol.
Vıtse-mınıstr depýtattardyń qatysýymen zańnamaǵa túgendeý júrgizip, osy máselelerdi sheshýdiń tujyrymdamalyq tásilin ázirleý múmkin ekendigin atap ótedi.
— Mınıstrlik atalǵan máselelerdi óz alańynda pysyqtaýǵa jáne tıisti usynystardy ázirleýge qatysýǵa daıyn, — dedi Rahymjan Isaqulov.
Buǵan deıin 78 páter ıeleri kooperatıvi men páter ıeleriniń tutyný kooperatıvteri qaıta tirkeýden óte almaǵanyn jazǵan edik.
