Turǵyn úılerdiń shatyryn qar men muzdan tazalaý kimniń mindeti
ALMATY. KAZINFORM — Almatyda kóppáterli turǵyn úılerge qyzmet kórsetetin basqarý uıymdary shatyrlardy, mańdaıshalardy jáne ortaq múlikke jatatyn ózge de qurylymdardy qar men muzdan ýaqytyly tazalaýǵa mindetti.
Qalalyq kommýnaldyq ınfraqurylym jáne turǵyn úı ınspektsııasy zań boıynsha turǵyn úıdi kútip ustaýǵa basqarýshy uıymdar jaýap beretinin eske saldy. MIB, PIK jáne basqarýshy kompanııalar úıler men olardyń aınalasynyń tazalyǵy men tehnıkalyq jaǵdaıyn kútip ustaýǵa tıis.
Mindetti jumystar tizbesine aýlalardy kútip ustaý, qar men muzdy tazalaý, shatyrlar men mańdaıshalardy jáne ortaq múliktiń basqa da qurylymdaryn muz qursaýynan aryltý kiredi. Bul sharalar turǵyndardyń qaýipsizdigin qamtamasyz etýge jáne jazataıym jaǵdaıdyń aldyn alýǵa baǵyttalǵan.
— Bul jumystardy oryndaý kezinde qaýipsizdik talaptaryn saqtaý erekshe mańyzǵa ıe. Tazalaý barysynda qaýipti aýmaqtar eskertý lentasymen qorshalyp, turǵyndar aldyn ala habardar etilýge tıis. Sondaı-aq barlyq jumys qaýipsizdik tehnıkasy talaptaryna saı júrgizilýi qajet, — delingen habarlamada.
Vedomstvonyń málimetinshe, ortaq múlikti tıisinshe kútip ustamaý, onyń ishinde qar men muzdy ýaqytyly tazalamaý úshin jaýapkershilik basqarý uıymynyń tóraǵasyna nemese qyzmet kórsetýshi uıymǵa júkteledi. Zııan keltirilgen nemese daýly jaǵdaı týyndaǵan shaqta turǵyndar óz quqyǵyn zańnamada belgilengen tártippen, onyń ishinde sot organdaryna júginý arqyly qorǵaýǵa quqyly.
Eske salaıyq, buǵan deıin Qazaqstanda PIK pen MIB-tiń aı saıynǵy esepti usyný merzimderi ózgertilgenin habarlaǵanbyz.