Turǵyn úılerdiń aýlasynda órt sóndirý kólikterine arnaıy oryndar belgilenbek
ASTANA. KAZINFORM — Turǵyn úılerdiń aýlasynda órt sóndirý kólikterine arnalǵan arnaıy oryndar belgilenbek. Bul týraly búgin Úkimet otyrysynan keıingi baspasóz máslıhatynda Tótenshe jaǵdaılar mınıstri Murat Muhanov aıtty.
Onyń atap ótýinshe, qazirgi ýaqytta elordada turǵyn úılerden órt shyqqan kezde kólikterdiń joldy bógeýi saldaryna týyndaıtyn problema bar.
— Mundaı problemalar buryn da boldy, qazir de kezdesedi. Ásirese túngi ýaqytta jıi tirkeledi. Bul máseleni sheshý úshin órt sóndirý bólimderinde evakýatorlar men kólikti astynan kóterip, alyp shyǵýǵa arnalǵan arnaıy qurylǵylar bar. Degenmen, qazirgi ýaqytta zań jobalaryna birqatar usynys engizildi. Qazir olardyń qabyldanýyn kútip otyrmyz. «Azamattyq qorǵaý týraly» zańǵa da tıisti ózgerister usynyldy. Bul baǵytta ákimdiktermen birlesip jumys júrgizip jatyrmyz, — dedi ol.
Mınıstrdiń sózine qaraǵanda, jylytý maýsymy bastalǵannan beri órt sóndirýshiler aýlalardy aralap, ár úıge kirip, órt qaýipsizdigi talaptaryn túsindiredi. Kólik ıelerine de túngi ýaqytta órt qaýipsizdigin saqtaý qajettigin eskertedi.
— Óıtkeni aýlaǵa órt sóndirý qyzmetiniń ǵana emes, jedel járdem kóliginiń de kedergisiz kirýi mańyzdy. Osyǵan baılanysty zań jobalaryna joldardy bógemeý jáne ár aýlada órt sóndirý kólikterine arnalǵan arnaıy oryn belgileý týraly usynystar engizildi. Buǵan deıin mundaı talap bolmaǵan. Qazir osy normalardy zańnamaǵa engizýdi usynyp otyrmyz. Aldaǵy ýaqytta olar zańnamalyq deńgeıde bekitiledi, — dedi Murat Muhanov.
Aıta keteıik, búgin Úkimet otyrysynda jylý berý maýsymynyń barysy men jylytý kezeńindegi órt qaýipsizdigin qamtamasyz etý máselesi qaraldy. Alqaly jıyn barysynda Premer-mınıstr Oljas Bektenov jylýǵa qatysty turǵyndardan shaǵym kóp túsken óńirlerdi atady.