Turǵyn úıge zańsyz úlesker tartý, jarnamalaý: aıyppul mólsheri 7 ese ósti
ASTANA. KAZINFORM – QR ÓQM Qurylys jáne turǵyn úı kommýnaldyq sharýashylyq isteri komıteti tóraǵasy Baqytjan Júnisbekov jańa zańǵa saı turǵyn úı qurylysyna zańsyz úlesker tartý jáne jarnama jasaý áreketine qandaı jaza taǵaıyndalatynyn aıtty.
— Turǵyn úı qurylysyna úlestik qatysýdyń tartymdylyǵyn arttyratyn normalarmen qatar, osy saladaǵy memlekettik retteýdi kúsheıtýge baǵyttalǵan túzetýler de kózdelgen. “Azamattyq kodekske” túzetýler engizilip, salynyp jatqan turǵyn úılerge úlesker bolý úshin aldyn ala shart jasasýǵa tyıym salynǵan. “Ákimshilik quqyqbuzýshylyq týraly” QR Kodeksine zańsyz úlesker tartý jáne Biryńǵaı operatordyń ruqsatynsyz nemese kepildiginsiz jarnama taratý úshin aıyppul sanktsııalaryn 300-den 2000 AEK-ke deıin (1 179 600 teńgeden 7 864 000 teńgege deıin) ulǵaıtý jóninde túzetýler engizildi. QR «Jarnama týraly» Zańyna jergilikti atqarýshy organnyń ruqsatynsyz nemese Biryńǵaı operatordyń kepildiginsiz salynyp jatqan kóppáterli turǵyn úıdiń jarnamasyn taratýǵa tyıym salatyn túzetýler endi, – dedi ol OKQ alańynda ótken baspasóz máslıhatynda.
Spıkerdiń aıtýynsha, QR «Tólemder jáne tólem júıeleri týraly» Zańyna bankterge (EDB) satyp alynatyn úleske tólemniń zańdylyǵyn «KAZREESTR» aqparattyq júıesi arqyly tekserýge múmkindik beretin túzetýler de kózdelgen. Atalǵan júıege qoljetimdilikti «Qazaqstan turǵyn úı kompanııasy» AQ qamtamasyz etedi.
— QR «Bankter jáne bank qyzmeti týraly» Zańyna jergilikti atqarýshy organnyń ruqsaty nemese Biryńǵaı operatordyń kepildigi joq nysandarǵa ıpoteka berýge tyıym salýǵa baǵyttalǵan túzetýler engizilgen. QR «Turǵyn úı qurylysyna úlestik qatysý týraly» Zańyna az qabatty qurylysty da osy Zańnyń qoldanylý aıasyna engizetin túzetýler qarastyrylǵan, – dep túıdi sózin Baqytjan Júnisbekov.
Ózgeristerge saı, endigi jerde satyp alýshy qurylys nysanynyń Biryńǵaı operatordan kepildigin baryn onlaın teksere alady.
Sondaı-aq salynyp jatqan úıden “Otbasy” arqyly ıpoteka rásimdeý talaptary aıtyldy.
Odan bólek qurylys kompanııalarynyń Biryńǵaı operator kepildigin alýy jeńildetildi.
Endi úlesker qolma-qol aqshaǵa páter satyp ala almaıdy.