Turǵyn úıdegi gaz jarylysy: bir adam asa aýyr halde jatyr
QARAǴANDY. KAZINFORM – Qaraǵandy oblysynyń densaýlyq saqtaý basqarmasy Botaqara kentinde gaz jarylysy saldarynan úıindiniń astynda qalyp, zardap shekkenderdiń jaǵdaıy týraly aıtyp berdi. Bir naýqas asa aýyr halde jatyr.
«Aımaqtyń medıtsınalyq mekemelerine bes zardap shekkender, onyń ishinde úsh bala jetkizildi. Eki bala ambýlatorııalyq emdelýge jiberildi, bir bala oblystyq balalar klınıkalyq aýrýhanasyna qanaǵattanarlyq jaǵdaıda jetkizildi. Eki eresek patsıenttiń bireýi óte aýyr jaǵdaıda (80% kúıik shalǵan), ekinshisiniń jaǵdaıy qanaǵattanarlyq. Patsıentterge barlyq qajetti medıtsınalyq kómek kórsetilip jatyr», - dep málimdedi Qaraǵandy oblystyq densaýlyq saqtaý basqarmasy.
Psıholog mamandardyń kómegin qajet etken 25 turǵynǵa shuǵyl psıhologııalyq kómek kórsetildi.
Eske sala keteıik, Buqar Jyraý aýdanynyń Botaqara kentinde 30 qańtar saǵat 00:07-de eki qabatty 12 páterli turǵyn úıdiń ekinshi qabattaǵy páterinde tsılındrlik gaz jaryldy. Páterdiń ústindegi shatyr, qabyrǵalar men edender, sonyń ishinde birinshi qabattaǵy páterler tolyǵymen qulady. Sonymen qatar basqa páterler de ishinara zaqymdalǵan. Turǵyn úıde jalpy 46 adam turǵan. Jarylys kezinde 35 adam boldy. Apattyq-qutqarý jumystary kezinde úıindilerden qaza tapqan 2 adam jáne jaraqat alǵan 5 adam, onyń ishinde 3 bala shyǵaryldy.
Qutqarý jumystaryna 139 adam jáne 32 tehnıka jumyldyryldy. Qazirgi ýaqytta apattyq-qutqarý jumystary aıaqtaldy.
Oqıǵa ornynda jedel shtab ashyldy. Qaraǵandy oblysy TJD-da 8-7212 51-72-23 nómiri boıynsha jedel jeli istep tur.
