Turǵyn úıdegi eskirgen lıftini qandaı jaǵdaıda jańartyp alýǵa bolady

ASTANA. KAZINFORM — Elimizde tehnıkalyq saraptama tozyǵy jetken dep tanyǵan 3500 turǵyn úı lıftisi áli qoldanylyp keledi. Al bundaı lıftilerdi aýystyrýdyń óz sharttary bar. Bul týraly Ónerkásip jáne qurylys mınıstrligi Turǵyn úı-kommýnaldyq sharýashylyǵyn damytý basqarmasynyń basshysy Qabı Qarahan aıtty. 

— Qazirgi kezde el boıynsha jalpy turǵyn úılerde ornalasqan 34 myńnan astam lıfti bar. Onyń 5 myńǵa jýyǵy 25 jyldan artyq ýaqyt qoldanylǵan, onyń ishinde 3500-in tehnıkalyq saraptama tozyǵy jetken dep tanyǵan. Biraq olar áli kúnge deıin qoldanylyp keledi, — dedi ol «Jibek joly» telearnasyndaǵy «Búgin LIVE» baǵdarlamasynda.

Spıker lıftini aýystyrý qymbat qyzmet ekenin, kóp jaǵdaıda oǵan turǵyndardyń qarjylyq jaǵdaıy jetpeıtinin atap ótti. Sondyqtan bundaı jumys úshin 2017 jyldan beri memleketten jeńildetilgen nesıe berip keledi eken.

— Lıfti aýystyrylǵan jaǵdaıda, keıin árbir turǵyn osy qarjyny qaıtarý úshin óz páteriniń sharshy metrine baılanysty tólem jasaıdy. Bul másele qarjyǵa qatysty, ıaǵnı ony qaıtarý kerek bolǵasyn turǵyndardyń 51 paıyzy bul jumysty qoldap daýys berýi kerek. Osynsha daýys jınalmasa, tipten ákimdik tarapynan tıisti qarjy bólinip tursa da, lıft aýystyrylmaıdy, — dedi Qabı Qarahan.

Odan bólek, basqarma basshysy ulttyq standartqa saı lıftiler jylyna bir ret mindetti túrde tekserýden ótetinin atap ótti.

—Úıdiń sharýashylyǵyn basqarýshy kompanııa servıstik kompanııamen shart jasasýy kerek. Aǵymdaǵy jóndeý jumystary qajet bolǵan jaǵdaıda jasalynady, al odan bólek jylyna bir ret kúrdeli tehnıkalyq baqylaý júrgizilýi kerek, — dedi ol.

Eske sala keteıik, jýyrda ǵana elordada ishinde bala bolǵan lıft úzilip ketkeni jazǵan edik.