Turǵyn úıdi satyp alý-satý mámileleriniń sany 3,1% azaıdy
ASTANA. KAZINFORM — 2025 jylǵy qarasha aıynda turǵyn úıdi satyp alý-satý boıynsha 39 973 mámile tirkelgen, onyń ishinde jeke úıler boıynsha 8 751 jáne kóppáterli úılerdegi páterler boıynsha — 31 222 mámile jasaldy. Bul týraly Ulttyq statıstıka bıýrosy málim etti.
2025 jylǵy qazanmen salystyrǵanda (41 259) turǵyn úıdi satyp alý-satý mámileleriniń sany 3,1% azaıdy. Mámileler sany boıynsha Astana (8 861 — 22,2%) jáne Almaty (7 443 — 18,6%) qalalary, sonymen qatar, Qaraǵandy oblysy (2 731 — 6,8%) kósh bastap tur. Mámileler sany Ulytaý oblysynda eń az — 339 mámile (0,8%).
2025 jyldyń qazanymen salystyrǵanda qarashada mámileler sanynyń eń kóp ósimi Qyzylorda (+19,7%), Qostanaı (+19,5%) jáne Jetisý (+14,2%) oblystarynda baıqaldy. Al Mańǵystaý (-17,7%), Aqmola (-15,2%) jáne Atyraý (-12,7%) oblystarynda bir aıdaǵy eń kóp tómendeý anyqtaldy.
Bir aıdyń ishinde kóppáterli úılerdegi turǵyn úı mámileler sany 4,1% (1 320 mámilege) azaıǵan. 2025 jyldyń qarasha aıynda páterler boıynsha barlyǵy 31 222 mámile jasaldy, bul mámilelerdiń jalpy sanynyń 78,1%-y. Kóppáterli úılerdegi turǵyn úı saýdasynyń negizgi úlesi Astana (27,9%), Almaty (21,9%) qalalaryna jáne Qaraǵandy oblysyna (7,3%) tıesili. Bólmeler sany boıynsha 2 bólmeli páterler satylymy basym boldy, 2025 jyldyń qarasha aıynda olar boıynsha 11 888 mámile resimdelgen.
Jeke turǵyn úıler boıynsha mámileler sany 0,4% (34 mámilege) ósti. Qarashada barlyǵy 8 751 mámile tirkelgen. Jeke turǵyn úıler boıynsha mámileler sanynyń eń kóp ósimi Qyzylorda (+33,6%), Jetisý (+25,4%) jáne Abaı (+11,3%) oblystarynda baıqaldy. Al Mańǵystaý (-12,8%) oblysynda, Shymkent (-12,1%) qalasynda jáne Ulytaý (-11,3%) oblysynda bir aıdaǵy eń kóp tómendeý tirkeldi.
2025 jylǵy qarashada turǵyn úıdi satyp alý-satý mámileleri byltyrǵy jylǵy tıisti aımen salystyrǵanda 1,4% ósken, ol kezde 39 421 mámile resimdelgen bolatyn. Mámileler sanynyń eń joǵarǵy ósimi Jetisý oblysynda (31,3%) baıqaldy, eń úlken tómendeý — Ulytaý oblysynda (-31%). 2025 jyldyń qańtar-qarasha aılaryndaǵy mámileler sanyn 2024 jylǵy qańtar-qarasha aılaryndaǵy mámileler sanymen salystyrǵanda 3,3% ósim baıqaldy.
Bir jylda (2025 jylǵy qarasha 2024 jylǵy qarashaǵa) jańa turǵyn úılerdi satý baǵasy 15,5%, qaıtalama naryqta páterlerdi qaıta satý baǵalary 14,3% joǵarylady. Abattandyrylǵan turǵyn úıdi jalǵa alý tólemi 11,9% ósti.
Óńirler bólinisinde jańa turǵyn úıdiń baǵasy jyldyq mánde kelesi qalalarda edáýir qymbattady:
- Almaty — 19,9%,
- Pavlodar — 19,6%,
- Qonaev — 17,5%,
- Astana — 17,4%.
Qaıtalama naryqta baǵa ósimi:
- Almaty (23%),
- Aqtóbe (19,4%),
- Pavlodar (17,5%) qalalarynda baıqaldy.
Al turǵyn úıdi jalǵa alý naryǵynda:
- Pavlodar (36,9%),
- Aqtóbe (34,3%),
- Petropavl (25,6%),
- Qyzylorda (19,7%),
- Óskemen (18,9%)
- Astana qalalarynda (17,7%) tirkeldi.
Osyǵan deıin Abaı oblysynda qurylys kompanııasy 64 úleskerdi aldaǵanyn jazǵanbyz.